Тошкент, Ўзбекистон (UzDaily.uz) — «Ўзатом» агентлиги делегацияси 27 октябрь куни Минск шаҳрида Беларусь энергетика вазири Денис Мороз билан учрашувда Беларусь корхоналарининг Ўзбекистонда интеграциялашган атом электр станциясини қуриш лойиҳасида иштирок этиши, энергетика ускуналарини маҳаллийлаштириш ва саноат кооперациясини ривожлантириш масалаларини муҳокама қилди.
Музокаралар Ўзбекистон делегациясининг Беларусьга ишчи ташрифи доирасида бўлиб ўтди. Томонлар атом энергетикаси соҳасидаги ҳамкорлик истиқболлари, шунингдек, Беларусь мутахассислари ва корхоналарининг салоҳиятини Ўзбекистон миллий ядровий энергетика дастурини амалга оширишга жалб этиш имкониятларини кўриб чиқди.
Беларусь атом электр станцияси ва унга туташ инфратузилмани қуриш учун малакали кадрларни танлашда ҳам амалий ёрдам кўрсатмоқда.
Денис Морознинг сўзларига кўра, ҳамкорликнинг истиқболли йўналишларидан бири трансформатор ускуналарини ишлаб чиқариш ҳисобланади. Беларусь томони В. И. Козлов номидаги Минск электротехника заводи, «Ўзатом» агентлиги ва Россиянинг «Росатом» давлат корпорацияси ўртасидаги ҳамкорлик вариантларини ишлаб чиқишга тайёр.
Вазир, шунингдек, ускуналар етказиб бериш ва қўшма ишлаб чиқариш корхоналарини ташкил этишни ўз ичига олган саноат кооперациясини кенгайтириш имкониятларини қайд этди.
«Ўзатом» агентлиги директори Азим Ахмедхаджаев эса атом электр станциясини қуриш лойиҳасини амалга ошириш учун зарур тажриба ва билимларга эга ҳамкорлар билан ўзаро ҳамкорлик қилиш муҳимлигини таъкидлади. Унинг айтишича, келгусидаги қўшма ишлар шерикликни мустаҳкамлаш ва амалий натижаларга эришишга хизмат қилиши керак.
Учрашув якунида томонлар ҳамкорликнинг муайян йўналишлари бўйича таклифлар алмашинувини давом эттириш ва кейинчалик биргаликда ишлаб чиқиш учун лойиҳаларни белгилашга келишиб олди.
