ТИИФ қошидаги Ўзбекистон-Саудия Арабистони Бизнес Кенгаши натижалари: аэропорт, маълумотлар маркази ва инфратузилма лойиҳалари

Тошкент, Ўзбекистон (UzDaily.uz) — 5-Тошкент халқаро инвестиция форуми доирасида Ўзбекистон Республикаси Инвестициялар, саноат ва савдо вазири Лазиз Кудратов 200 га яқин йирик тадбиркорлани жамлаган Ўзбекистон-Саудия Арабистони ишбилармонлар кенгашининг 7-йиғилишида иштирок этди.

Тадбирда стратегик инфратузилмани ривожлантиришга қаратилган муҳим ҳужжатлар имзоланди.

Томонлар янги халқаро аэропорт қурилиши, сув хўжалиги тизимларини модернизация қилиш, марказлаштирилган совитиш тизимини жорий этиш, шунингдек, чиқиндиларни бошқариш ва ўзаро франчайзингни ривожлантириш лойиҳалари бўйича келишувларни имзоладилар.

Рақамлаштириш соҳасидаги яна бир улкан қадам ДатаВолт компанияси ҳамда нуфузли халқаро молия институтлари консорциуми ўртасидаги битим бўлди.

Ушбу келишув IT Park Tashkent ҳудудида замонавий маълумотларни қайта ишлаш марказини (дата-марказ) барпо этиш учун молиялаштиришни очиб беради.