Пекинда Хитой-Қирғизистон-Ўзбекистон темир йўл лойиҳаси муҳокама қилинди

Тошкент, Ўзбекистон (UzDaily.uz) — Пекинда Хитой-Қирғизистон-Ўзбекистон темир йўлини қуриш ва эксплуатация қилишни бошқариш бўйича халқаро семинар бўлиб ўтмоқда. Ушбу тадбир минтақавий транспорт инфратузилмасини ривожлантириш учун стратегик аҳамиятга эга.

Семинарда Ўзбекистон Транспорт вазирлиги, Ўзбекистон темир йўллари, Тошкент давлат транспорт университети ва Транспортни назорат қилиш инспекцияси вакиллари иштирок этмоқда.

Тадбир давомида Ўзбекистон ва Қирғизистон мутахассислари, шунингдек, илмий ҳамжамият ва давлат идоралари вакиллари темир йўл транспортидаги замонавий тенденциялар ва инновацион ечимлар билан танишадилар.

Семинар транспорт ва логистика соҳасида халқаро ҳамкорликни мустаҳкамлаш, темир йўл инфратузилмасини ривожлантириш ва йирик минтақавий лойиҳаларни бошқариш тажрибаси билан ўртоқлашишга қаратилган.

Чегаралараро темир йўл лойиҳаларида халқаро стандартларни уйғунлаштириш, юқори тезликдаги темир йўл тизимларини бошқариш ва инновацион технологияларни жорий этишга алоҳида эътибор қаратилади.

Иштирокчилар шунингдек, стратегик аҳамиятга эга бўлган Хитой-Қирғизистон-Ўзбекистон транспорт йўлагининг техник ва эксплуатацион жиҳатларини ҳам муҳокама қиладилар.