Ўзбекистон Cadila Pharmaceuticals билан янги лойиҳаларни муҳокама қилди

Тошкент, Ўзбекистон (UzDaily.uz) — Тиббиёт ва фармацевтика тармоғини ривожлантириш агентлиги директори Абдулла Азизовнинг Ҳиндистон Республикасига хизмат сафари доирасида мамлакатнинг етакчи фармацевтика компанияларидан бири — Cadila Pharmaceuticals раҳбарияти билан учрашув бўлиб ўтди.

Музокаралар чоғида Ўзбекистонда замонавий фармацевтика ишлаб чиқариш қувватларини ташкил этиш, дори воситалари ишлаб чиқаришни маҳаллийлаштириш, илғор технологияларни жорий этиш ҳамда инвестиция лойиҳаларини амалга ошириш истиқболлари муҳокама қилинди.

Шунингдек, компания вакилларига «BioPharma City» фармацевтика кластерининг имкониятлари, хорижий инвесторлар учун яратилган қулай шарт-шароитлар, шунингдек, қўшма ишлаб чиқаришларни йўлга қўйиш ва юқори технологияли лойиҳаларни амалга ошириш учун тақдим этилаётган имкониятлар ҳақида батафсил маълумот берилди.

Томонлар «BioPharma City» доирасида қўшма лойиҳаларни амалга ошириш, ишлаб чиқариш инфратузилмасини ривожлантириш, халқаро сифат стандартларини жорий этиш ҳамда технологиялар трансфери бўйича ҳамкорликни кенгайтириш юзасидан фикр алмашдилар.