«Ўзтемирйўлйўловчи» одамлар билан тўлган поезд видеосини ўрганади

Тошкент, Ўзбекистон (UzDaily.uz) — «Ўзтемирйўлйўловчи» компанияси ижтимоий тармоқларда тарқалган Сурхондарё вилоятидаги Сариосиё–Термиз йўналишида ҳаракатланувчи поездга оид видеоларни ўрганишни бошлади. Кадрларда йўловчилар купе вагонида тик тургани ёки йўлакда ўтиргани акс этган. Видеолардан бирида вагонда совитиш тизими ишламагани ҳам таъкидланган. Бу ҳақда компания хабар берди.

«Ўзтемирйўлйўловчи» маълум қилишича, Сариосиё–Термиз йўналишидаги поезд тўртта вагондан иборат. Ушбу поездга чипталар ўрин рақами кўрсатилмаган ҳолда сотилади, шу сабабли йўловчилар бўш жойларни эгаллайди.

Компания маълумотига кўра, ҳар бир вагон 81 та ўтириш ўрнига мўлжалланган ва зарур қулайликлар билан жиҳозланган. «Ўзтемирйўлйўловчи»да ёзги мавсумда совитиш тизимлари узлуксиз ишлаши, қишки даврда эса вагонларда иситиш таъминланиши кераклиги таъкидланди.

Шу билан бирга, компания дам олиш ва байрам кунларида айрим қатновларда йўловчилар оқимининг кескин кўпайиши сабабли йўловчилар сони одатдагидан кўпроқ бўлиши мумкинлигини тан олди.

«Ўзтемирйўлйўловчи» ижтимоий тармоқларда тарқатилган маълумотларни ўрганаётганини ва текширув натижаларига кўра зарур чоралар кўришини билдирди.