Тошкент, Ўзбекистон (UzDaily.uz) — Ўзбекистон ва Германия компаниялари ўзбекистонлик ҳайдовчиларнинг Германия транспорт-логистика соҳасида ишга жойлашишини соддалаштириш чораларини муҳокама қилмоқда. Таклифлар орасида Ўзбекистоннинг миллий ҳайдовчилик гувоҳномаларини тан олиш ва автобус ҳамда юк автомобиллари ҳайдовчиларини тайёрлаш учун қўшма автомобиль мактабини ташкил этиш масалалари бор.
Ушбу масалаларни Ўзбекистон Миграция агентлиги раҳбари ўринбосари Элёр Тоштемиров Германиянинг Global Talent Alliance ва TSK Logistik компаниялари вакиллари билан муҳокама қилди.
Учрашув якунлари бўйича Миграция агентлиги ва Global Talent Alliance ҳамкорлик тўғрисидаги келишувни имзолади. Устувор ташаббуслар қаторида Ўзбекистон ҳайдовчилик гувоҳномаларини бевосита тан олиш имкониятини Германиянинг ваколатли органлари билан келишиш ҳам белгиланган.
Томонлар Германия ва Ўзбекистон ҳамкорлигида автомобиль мактабини ташкил этиш масаласини ҳам кўриб чиқдилар. Ушбу мактаб Германиядаги иш берувчилар талаблари ва мамлакат стандартларини ҳисобга олган ҳолда автобус ҳамда юк автомобиллари ҳайдовчиларини тайёрлаши кўзда тутилмоқда.
Учрашув иштирокчилари виза расмийлаштириш жараёнида номзодлар дуч келаётган қийинчиликларга ҳам алоҳида эътибор қаратдилар.
Миграция агентлиги қўшма автомобиль мактабини ташкил этиш ташаббусини қўллаб-қувватлашга ва уни амалга оширишга кўмаклашишга тайёрлигини билдирди. Шу билан бирга, Ўзбекистон ҳайдовчилик гувоҳномаларини Германияда тан олиш ҳозирча ваколатли органлар билан келишишни талаб қиладиган ташаббус сифатида белгиланган.
