Тошкент, Ўзбекистон (UzDaily.uz) — Ўзбекистон ва Жаҳон банки иқтисодий ўсишни жадаллаштириш, янги иш ўринларини яратиш ва хусусий инвестицияларни жалб этиш бўйича чора-тадбирларни муҳокама қилди. Ушбу масалалар Ўзбекистон Бош вазири ўринбосари — иқтисодиёт ва молия вазири Жамшид Қўчқоровнинг Жаҳон банкининг Европа ва Марказий Осиё бўйича вице-президенти Антонелла Бассани билан учрашувида асосий ўрин тутди.
Музокаралар 2026 йил 15 октябрь куни Бангкокда Халқаро валюта жамғармаси ва Жаҳон банкининг йиллик йиғилишлари доирасида бўлиб ўтди. Бу ҳақда Ўзбекистон Иқтисодиёт ва молия вазирлигининг Ахборот хизмати ва коммуникациялар бошқармаси хабар берди.
Учрашувда, шунингдек, Жаҳон банкининг стратегия ва операцион масалалар бўйича директори Сажжад Шоҳ, инфратузилма бўйича минтақавий директори Чарльз Кормье, Ўзбекистон Марказий банки раисининг ўринбосари Нодирбек Очилов, иқтисодиёт ва молия вазирининг маслаҳатчиси Жасур Қаршибоев ҳамда бошқа вакиллар иштирок этди.
Томонлар Ўзбекистондаги иқтисодий ва молиявий тенденциялар, амалга оширилаётган ислоҳотлар ҳамда келгусидаги ҳамкорликнинг устувор йўналишларини кўриб чиқди. Иқтисодий ривожланишни жадаллаштириш ва аҳоли фаровонлигини оширишга қаратилган New Growth Program for Jobs («Иқтисодий ўсиш ва иш ўринларини яратиш бўйича янги дастур») дастурига алоҳида эътибор қаратилди.
Муҳокамалар доирасида меҳнат унумдорлигини ошириш, инсон капиталини ва касбий кўникмаларни ривожлантириш, юқори қўшилган қийматга эга маҳсулотлар экспортини кенгайтириш ҳамда хусусий инвестицияларни рағбатлантириш масалалари кўриб чиқилди.
Кичик ва ўрта бизнесни, жумладан, хотин-қизлар тадбиркорлиги ва ёшлар томонидан ташкил этилаётган стартапларни қўллаб-қувватлаш ҳам алоҳида йўналишлардан бири бўлди.
Учрашув иштирокчилари пенсия тизимини ислоҳ қилиш масалаларини ҳам муҳокама қилди. Хусусан, пенсия жамғармаларини бошқариш механизмларини такомиллаштириш, хусусий ва корпоратив пенсия жамғармалари фаолияти учун ҳуқуқий асосларни ривожлантириш масалаларига тўхталиб ўтилди.
Музокаралар якунида томонлар кўриб чиқилган йўналишлар бўйича ҳамкорликни давом эттиришга келишиб олди. Вазирлик хабарида янги лойиҳалар, молиялаштириш ҳажмлари ва уларни амалга ошириш муддатлари келтирилмаган.
