Тошкент, Ўзбекистон (UzDaily.uz) — 2026 йил 1 сентябрь ҳолатига кўра, Ўзбекистон тижорат банкларининг кредит портфели 648,9 трлн сўмни ташкил этди. Бу ўтган йилнинг шу даврига нисбатан 11,7 фоизга ёки 67,9 трлн сўмга кўпдир. Жисмоний шахсларга ажратилган кредитлар 18,6 фоизга ошиб, 243,6 трлн сўмга етди. Уларнинг кредит портфелидаги улуши эса 37,5 фоизни ташкил қилди. Бу ҳақда Ўзбекистон Республикаси Марказий банки хабар берди.
Саноат соҳасига ажратилган кредитлар бир йилда 10,9 фоизга камайиб, 132,4 трлн сўмни ташкил этди. Ушбу кредитларнинг умумий портфелдаги улуши 25,6 фоиздан 20,4 фоизга тушди.
Қишлоқ хўжалигига кредит ажратиш ҳажми 14,6 фоизга ошиб, 66,7 трлн сўмга етди. Савдо ва умумий овқатланиш ҳамда аҳолига хизмат кўрсатиш соҳаларига берилган кредитлар 23,5 фоизга ўсиб, 51 трлн сўмни ташкил қилди. Қурилиш соҳасига ажратилган кредитлар 35,5 фоизга ошиб, 22,5 трлн сўмга етди. Транспорт ва коммуникация соҳаларига берилган кредитлар эса 2,4 фоизга камайиб, 32,9 трлн сўмни ташкил этди.
2026 йил бошидан буён банкларнинг кредит портфели 7,4 фоизга ўсди. Шу даврда ипотека кредитлари 12,9 фоизга ошиб, 89,7 трлн сўмга етди. Жисмоний шахсларга берилган микрокредитлар 19,1 фоизга ўсиб, 48,2 трлн сўмни ташкил қилди.
Микроқарзлар ҳажми 5 фоизга ошиб, 51,3 трлн сўмга етди. Автокредитлар 3,2 фоизга ўсиб, 41 трлн сўмни ташкил қилди. Кредит карталари ва овердрафтлар ҳажми 38,1 фоизга ошиб, 6,1 трлн сўмга етган бўлса, таълим кредитлари 1,1 фоизга камайиб, 6,9 трлн сўмни ташкил этди. Юридик шахсларга ажратилган кредитлар йил бошидан буён 5,6 фоизга ўсиб, 405,3 трлн сўмга етди.
Хорижий валютадаги кредитлар ҳажми 248,1 трлн сўмни ташкил этди. Уларнинг умумий кредит портфелидаги улуши 40,3 фоиздан 38,2 фоизга камайди.
Узоқ муддатли кредитлар 571,8 трлн сўмни ёки жами кредит портфелининг 88,1 фоизини ташкил қилди.
Давлат улуши мавжуд банкларнинг кредит портфели 6,7 фоизга ўсиб, 421,5 трлн сўмга етди. Қолган банкларда эса ушбу кўрсаткич 22,2 фоизга ошиб, 227,5 трлн сўмни ташкил қилди.
Энг йирик кредит портфеллари Ўзбекистон Миллий банкида — 104 трлн сўм, Агробанкда — 94,7 трлн сўм ва Ўзсаноатқурилишбанкда — 59,1 трлн сўм қайд этилди.
Тошкент шаҳри ҳиссасига 293,7 трлн сўмлик кредитлар тўғри келиб, бу умумий кредит портфелининг 45,3 фоизини ташкил қилди. Ҳудудлар орасида энг кўп кредитлар Фарғона вилоятида — 38 трлн сўм ва Самарқанд вилоятида — 33,8 трлн сўм миқдорида қайд этилди.
2026 йил 1 сентябрь ҳолатига кўра, муаммоли кредитлар ҳажми 24 трлн сўмни ёки умумий кредит портфелининг 3,7 фоизини ташкил этди. Давлат улуши мавжуд банкларда муаммоли кредитлар улуши 3,9 фоизга, бошқа банкларда эса 3,3 фоизга тенг бўлди.
