Тошкент, Ўзбекистон (UzDaily.uz) — «Ўзбекнефтгаз» акциядорлик жамияти ва Беларусь саноат ускуналарини етказиб бериш, ишлаб чиқариш қувватларини модернизация қилиш ҳамда рақамли ечимларни жорий этишни ўз ичига олган технологик ҳамкорлик истиқболларини муҳокама қилди. Бу ҳақда «Ўзбекнефтгаз» АЖ ахборот хизмати хабар берди.
Музокаралар «Ўзбекнефтгаз» АЖ бошқаруви раисининг ўринбосари Фарид Мўминовнинг Беларуснинг Ўзбекистондаги Фавқулодда ва Мухтор элчиси Александр Огородников билан учрашуви доирасида бўлиб ўтди.
Учрашувда Ўзбекистон томони замонавий технологияларни жорий этиш, ишлаб чиқариш жараёнлари самарадорлигини ошириш ва истиқболли қўшма лойиҳаларни амалга ошириш муҳимлигини таъкидлади.
Шу муносабат билан «Ўзбекнефтгаз» Беларусь корхоналарининг технологик ускуналар етказиб бериш ва компаниянинг ишлаб чиқариш эҳтиёжларини ҳисобга олган ҳолда техник ечимларни жорий этиш бўйича таклифларини кўриб чиқишга қизиқиш билдирди.
Томонлар ишлаб чиқариш қувватларини модернизация қилиш, технологик жараёнларни такомиллаштириш ва корхоналарни замонавий ускуналар билан жиҳозлаш имкониятларига ҳам алоҳида эътибор қаратди.
Музокаралар иштирокчилари ишлаб чиқариш объектларини рақамлаштириш, жумладан, технологик жараёнларни автоматлаштириш, мониторинг тизимларини жорий этиш ва ишлаб чиқаришни бошқариш самарадорлигини ошириш истиқболларини ҳам кўриб чиқди.
Бундан ташқари, томонлар саноат ускуналари ва ихтисослаштирилган техникалар ишлаб чиқарувчи Беларусь корхоналари билан ҳамкорлик қилиш имкониятлари юзасидан фикр алмашди.
Беларусь маҳсулотларини «Ўзбекнефтгаз» объектларида қўллаш имкониятларини баҳолаш мақсадида техник ҳужжатлар, маҳсулот каталоглари ва тижорат таклифларини ўзаро алмашишни ташкил этиш таклиф қилинди.
