Тошкент, Ўзбекистон (UzDaily.uz) — Ўзбекистон Қишлоқ хўжалиги вазирлиги ва Американинг Valmont Industries компанияси вакиллари сув тежовчи технологияларни жорий этиш ҳамда суғориш тизимларини модернизация қилиш масалаларини муҳокама қилди.
Учрашув АҚШ Давлат котиби Марко Рубио бошчилигидаги делегациянинг расмий ташрифи доирасида Самарқандда бўлиб ўтди. Бу ҳақда UzDaily.uz хабар берди.
Ўзбекистон қишлоқ хўжалиги вазирининг маслаҳатчиси Нуриддин Қўшназаров Valmont Industries компаниясининг Мустақил Давлатлар Ҳамдўстлиги (МДҲ) мамлакатлари ва Туркия бўйича тижорат директори Сергей Стефанов ҳамда компания вакили Саидиброҳим Эшхўжаев билан музокаралар ўтказди.
Томонлар суғориш жараёнларини механизациялаш, сув тежовчи технологияларни жорий этиш ва сув ресурсларидан оқилона фойдаланиш масалаларини кўриб чиқди. Ўзбекистон ҳудудларида механизациялашган суғориш тизимларидан фойдаланишни кенгайтириш истиқболларига алоҳида эътибор қаратилди.
Учрашув иштирокчилари мавжуд суғориш инфратузилмасини модернизация қилиш ва қўшма лойиҳаларни амалга ошириш имкониятларини ҳам муҳокама қилди.
Ҳамкорлик қишлоқ хўжалигида илғор технологияларни жорий этиш, суғориш тизимлари самарадорлигини ошириш ҳамда Ўзбекистон ва АҚШ ишбилармон доиралари ўртасидаги амалий ҳамкорликни ривожлантиришга қаратилган.
