Тошкент, Ўзбекистон (UzDaily.uz) — Ўзбекистон Божхона қўмитаси жисмоний шахслар учун йўловчи божхона декларацияларини автоматик расмийлаштириш тизимини жорий этишни таклиф қилди.
Тегишли ҳужжат лойиҳаси норматив-ҳуқуқий ҳужжатлар муҳокамаси портали — СОВАЗда эълон қилинди. Ташаббус бўйича муҳокамалар 25 октябрга қадар давом этади.
Лойиҳада йўловчи божхона декларацияларини тўлдириш ва расмийлаштириш бўйича йўриқномани автоматлаштирилган расмийлаштириш тушунчаси билан тўлдириш назарда тутилган.
Таклифга кўра, бундай ҳолатларда божхона органлари тизими махсус алгоритмлар асосида декларацияларни ходимлар иштирокисиз қайта ишлайди.
Автоматик расмийлаштиришдан фақат Божхона қўмитасининг хавфларни бошқариш тизими паст хавф даражасини белгилаган декларациялар ўтиши мумкин.
Бунда декларацияларда валюта қимматликлари, олиб кириш ёки олиб чиқиш тақиқланган товарлар, шунингдек, мажбурий декларацияланиши лозим бўлган маҳсулотлар ҳақида маълумотлар бўлмаслиги керак.
Лойиҳага мувофиқ, автоматлаштирилган расмийлаштириш жараёнида божхона ходимининг электрон рақамли имзоси талаб этилмайди.
Ҳозирда ҳужжат жамоатчилик муҳокамаси босқичида бўлиб, таклиф этилаётган тартиб ҳали кучга кирмаган.
Аввалроқ, 2026 йил сентябрь ойи охирида Ягона интерактив давлат хизматлари порталида йўловчи божхона декларацияларини онлайн топшириш имконияти пайдо бўлган эди.
Ушбу хизмат фуқароларга шахсий фойдаланиш учун олиб кириладиган товарларни, жумладан, мобиль телефонлар, маиший техника, заргарлик буюмлари ва бошқа қимматбаҳо ашёларни олдиндан декларациялаш имконини беради.
Онлайн тўлдирилган декларация давлат чегарасидан ўтиш вақтида божхона ходимига тақдим этилиши керак. Хизмат бепул кўрсатилади.
