Тошкент, Ўзбекистон (UzDaily.uz) — «Ўзбекнефтгаз» АЖ хусусий Sanoat Energetika Guruhi (Saneg) компаниясининг нефть-газ конларидан фойдаланиш лицензияларининг бир қисми бекор қилинганидан кейин унинг активлари ёки улушларини қабул қилиб олмаганини маълум қилди.
Давлат компанияси вакиллари бу ҳақда 27 октябрь куни тўққиз ойлик фаолият якунларига бағишланган матбуот анжуманида маълум қилди. Бу ҳақда «Ўзбекнефтгаз» АЖ хабар берди.
Журналист лицензиялар қайтариб олинганидан кейин конларни тезкор ва молиявий бошқариш ким томонидан амалга оширилаётгани билан қизиқди. Компания бошқаруви раисининг қайта ишлаш бўйича ўринбосари Аброржон Худойберганов бу масалага ойдинлик киритди.
Унинг таъкидлашича, «Ўзбекнефтгаз»нинг Saneg компаниясига алоқаси йўқ.
«Saneg — алоҳида ташкилот. У бизнинг бўйсунувимизда эмас ва бу йўналишда у билан ҳамкорлигимиз мавжуд эмас. Бу маълумотни биз эълон қилмаганмиз. Менимча, уни эълон қилган идорага мурожаат қилиш тўғрироқ бўлади», — деди у.
Худойбергановнинг сўзларига кўра, лицензиялар бекор қилингани эълон қилинганидан кейин давлат компаниясига Saneg'нинг ҳеч қандай активлари ёки улушлари ўтказилмаган. Ҳозирда конларни ким бошқараётгани ва уларни ўзлаштириш ҳуқуқини бошқа компанияларга бериш режалаштирилаётгани ҳақида «Ўзбекнефтгаз»да маълумот берилмади.
Лицензиялар қайтариб олингани ҳақида 8 октябрь куни Давлат активларини бошқариш агентлиги директори Соҳибжон Муродов маълум қилган эди.
Унинг айтишича, бунга лицензия шартларининг бажарилмагани ва ер ости бойликлари участкаларини хўжалик фаолиятига жалб этиш бўйича ишлар амалга оширилмагани сабаб бўлган.
«Менга маълум бўлишича, ушбу конлар ишга туширилмаган, лицензия шартлари эса бажарилмаган. Шунинг учун бугунги кунга келиб лицензиялар бекор қилинди. Ҳозирда Геология вазирлиги улардан самарали фойдаланиш бўйича чора-тадбирларни ишлаб чиқмоқда», — деган эди Муродов.
Агентлик раҳбари конлар хусусий мулкка ўтказилмаганини ҳам аниқлаштирди. Унинг таъкидлашича, Saneg фақат ер қаъридан фойдаланиш ҳуқуқини берувчи лицензияларни олган.
Қанча лицензия бекор қилингани, бу қарор қайси конларга тааллуқли экани, улар қачон қабул қилингани ва компания фойдаланишида қанча участка қолгани ҳақида Муродов маълумот бермаган.
