Тошкент, Ўзбекистон (UzDaily.uz) — Ўзбекистон Тоғ-кон саноати ва геология вазирлиги Жанубий Кореянинг KOMIR ва SOAM корпорациялари вакиллари билан минерал ресурслар ва геологик хавфларни бошқариш лойиҳасини амалга ошириш масалаларини муҳокама қилди.
Учрашув 2026 йил 22 октябрь куни вазир ўринбосари Р. Юсупов раҳбарлигида бўлиб ўтди. Музокараларда вазирлик вакиллари, «Ўзбекгидрогеология» давлат муассасаси ҳамда «ГИДРОИНГЕО» институти мутахассислари ҳам иштирок этди.
Томонлар Корея халқаро ҳамкорлик агентлиги (KOICA) томонидан молиялаштирилаётган расмий ривожланишга кўмаклашиш (ODA) лойиҳасининг амалга оширилиш жараёнини кўриб чиқди. «Ўзбекистонда минерал ресурслар ва геологик офатларни бошқаришнинг интеграциялашган тизимини яратиш» деб номланган лойиҳа фойдали қазилмаларни бошқариш ва геологик хавфларни баҳолаш тизимини ривожлантиришга қаратилган.
Учрашувда Тошкент вилоятининг Ангрен ҳудудида дала тадқиқотларини ўтказиш ва лойиҳада кўзда тутилган ускуналарни кўчки хавфи мавжуд участкаларга ўрнатиш масалаларига алоҳида эътибор қаратилди.
Учрашув якунида иштирокчилар янги лойиҳалар бўйича ҳамкорлик қилиш истиқболлари ва келгусидаги ҳамкорликнинг устувор йўналишларини белгилаш юзасидан фикр алмашди.
