Тошкент, Ўзбекистон (UzDaily.uz) — Ўзбекистонда интернет орқали дори воситаларини сотишга қўшимча талаблар жорий этилиши мумкин.
Соғлиқни сақлаш вазирлиги тегишли ўзгартиришлар лойиҳасини ишлаб чиқди. Унга кўра, масофавий савдога фақат рецептсиз бериладиган дори воситалари ҳамда вазирлик томонидан тасдиқланган рўйхатга киритилган тиббий буюмлар учун рухсат берилиши таклиф этилмоқда. Ҳужжат жамоатчилик муҳокамасига қўйилган.
Таклиф этилаётган ўзгаришларга мувофиқ, бундай маҳсулотларни масофадан сотиш билан амалдаги лицензияга эга дорихоналар ва уларнинг филиаллари шуғулланиши мумкин бўлади. Бунда савдо нуқталарида буюртмаларни топшириш учун махсус жойлар жиҳозланиши керак.
Интернет орқали савдони ташкил этиш учун дорихоналар ўзларининг рақамли платформаси — веб-сайт ёки мобил иловага эга бўлиши талаб этилади.
Бошқа вариант сифатида маркетплейс ёки буюртмалар агрегатори билан махсус шартнома асосида ҳамкорлик қилиш имконияти ҳам назарда тутилган.
Лойиҳада сотувчи онлайн платформада тақдим этиши шарт бўлган маълумотларга нисбатан талаблар белгиланган. Харидорлар дорихонанинг юридик номи, СТИРи, манзили, алоқа маълумотлари ва лицензияси ҳақидаги ахборотни текшириш имкониятига эга бўлиши керак.
Дори воситаларининг карточкаларида халқаро патентланмаган номи, дозаси, қўллаш бўйича йўриқномаси, яроқлилик муддати, мавжудлиги ҳақидаги маълумотлар ва чакана нархи кўрсатилиши лозим. Шунингдек, савдо устамасини кўрсатиш ҳамда дори воситалари ва тиббий буюмларнинг мавжуд муқобиллари ҳақида маълумот тақдим этиш талаб қилинади.
Харидни расмийлаштиришдан олдин фойдаланувчиларга тўлов ва етказиб бериш шартлари, жумладан, етказиб бериш нархи ҳамда тахминий муддатлари ҳақида маълумот берилиши керак.
Ўзгартиришларнинг алоҳида қисми буюртмаларни ташиш тартибига тааллуқли. Етказиб беришни дорихоналарнинг ўзи ёки улар жалб қилган компаниялар амалга ошириши мумкин. Иккинчи ҳолатда хизматлар шартнома асосида кўрсатилиши керак. Фойдаланиладиган транспорт воситалари муайян товарлар учун белгиланган сақлаш шароитларини, жумладан, ҳарорат ва намлик даражасини таъминлайдиган ускуналар билан жиҳозланиши лозим.
Дори воситалари учун уларни ташқи таъсирлардан ҳимоя қиладиган қадоқлаш талаб этилади. Ташиш шароитлари бир-биридан фарқ қиладиган препаратларни ажратмасдан битта умумий идишга жойлаштиришга йўл қўйилмайди. Бундай дорилар учун алоҳида қадоқлардан фойдаланиш керак бўлади.
Буюртма топширилаётганда харидор қадоқни кўздан кечириши ва олинган товарларни расмийлаштирилган буюртма билан солиштириши мумкин бўлади. Агар маҳсулот таркиби буюртмага мос келмаса ёки қадоқ шикастланган бўлса, харидор курьер орқали хариддан воз кечиши мумкин. Бундай ҳолатда дорихонага рад этиш ҳақидаги хабар автоматик равишда юборилади.
Агар муаммо етказиб бериш жараёни якунланганидан кейин аниқланса, харидор онлайн платформа оператори орқали мурожаат юбориши мумкин бўлади.
Мурожаатда товар номи, серия рақами, рақамли маркировка коди ва аниқланган қоидабузарлик хусусияти кўрсатилиши керак. Оператор олинган маълумотларни дорихонага етказиши шарт бўлади.
Лойиҳада курьер ёки дорихона буюртма берувчи билан боғлана олмаган ҳолатларда амал қилиниши лозим бўлган тартиб ҳам назарда тутилган. Бундай вазиятда харидор буюртмани ўзи расмийлаштирган дорихонадан уч кун ичида мустақил равишда олиб кетиши мумкин бўлади.
Лойиҳа бўйича жамоатчилик муҳокамаси 19 ноябрга қадар давом этади.
