Ўзбекистонда экотадбиркорлар учун янги дастур бошланди

Тошкент, Ўзбекистон (UzDaily.uz) — Ўзбекистонда БМТ Тараққиёт дастурининг «Шаҳарларда циркуляр иқтисодиёт ва чиқиндиларни бошқаришни илгари суриш» лойиҳаси доирасида тадбиркорлар, стартап асосчилари ва ўзини ўзи банд қилганлар учун олти ҳафталик бепул ўқув дастури бошланди. Бу ҳақда БМТ Тараққиёт дастури хабар берди.

Тошкент, Ангрен ва Нукус шаҳарларида ўтказилаётган дастурда 100 дан ортиқ киши иштирок этмоқда. Қатнашчиларнинг камида ярмини аёллар ташкил этади.

Таълим дастури 12 та амалий семинар ва тажрибали тренерлар томонидан менторлик ёрдамини қамраб олади. Шунингдек, иштирокчилар ўз бизнесини йўлга қўйиш учун 10 минг долларгача бўлган грантни қўлга киритиш имконияти учун танловда иштирок этиши мумкин.

Ташаббус Чиқиндиларни бошқариш ва циркуляр иқтисодиётни ривожлантириш агентлиги билан ҳамкорликда амалга оширилмоқда. Лойиҳа «Ўзбекистон — 2030» стратегиясини қўллаб-қувватлайди ҳамда БМТнинг Барқарор ривожланиш мақсадларига эришишга ҳисса қўшади.

Хусусан, ташаббус аёллар ва қизларнинг ҳуқуқ ва имкониятларини кенгайтиришга қаратилган 5-Барқарор ривожланиш мақсади — «Гендер тенглиги»га, барқарор иқтисодий ўсиш, бандлик ва муносиб меҳнат шароитларини рағбатлантиришни назарда тутувчи 8-мақсад — «Муносиб меҳнат ва иқтисодий ўсиш»га ҳисса қўшади.

Шунингдек, лойиҳа хавфсиз, инклюзив ва экологик барқарор шаҳарларни яратишга қаратилган 11-мақсад — «Барқарор шаҳарлар ва аҳоли пунктлари», барқарор ишлаб чиқариш ва истеъмол моделларини шакллантириш билан боғлиқ 12-мақсад — «Масъулиятли истеъмол ва ишлаб чиқариш» ҳамда барқарор ривожланиш мақсадларига эришиш учун ҳамкорликни мустаҳкамлашга қаратилган 17-мақсад — «Барқарор ривожланиш йўлида ҳамкорлик» доирасидаги вазифаларга хизмат қилади.