Тошкент, Ўзбекистон (UzDaily.uz) — Ўзбекистон Савдо-саноат палатаси ҳузурида консалтинг компаниялари ассоциацияси ташкил этилди. Ушбу тузилма соҳа ривожига кўмаклашиш, консалтинг хизматлари сифатини ошириш ва маҳаллий компанияларнинг халқаро бозорлардаги мавқеини мустаҳкамлашга қаратилган.
22 октябрь куни консалтинг бизнеси вакиллари иштирокида учрашув бўлиб ўтди. Унда Савдо-саноат палатаси раисининг ўринбосари Баҳром Махматраемов ва ассоциация раиси Умидбек Сафаров қатнашди.
Тадбирда Deloitte & Touche, PricewaterhouseCoopers, Ernst & Young, KPMG ва Utax халқаро аудиторлик ва консалтинг компаниялари вакиллари, шунингдек, аудит, солиқ маслаҳатлари, бухгалтерия аутсорсинги ва бошқа хизматларга ихтисослашган ташкилотлар иштирок этди.
Қатнашчиларга янги ассоциациянинг мақсад ва вазифалари, фаолиятининг асосий йўналишлари ҳамда консалтинг бозорини ривожлантириш режалари тақдим этилди.
Ассоциациянинг устувор вазифаларидан бири компанияларни ягона профессионал платформада бирлаштириш, тажриба алмашишни кенгайтириш ва соҳа иштирокчилари ўртасидаги ҳамкорликни мустаҳкамлашдан иборат бўлади.
Шунингдек, ассоциация маҳаллий консалтинг хизматларини халқаро талабларга мувофиқлаштириш имконини берадиган стандартларни ишлаб чиқишга кўмаклашишни режалаштирмоқда.
Фаолиятнинг алоҳида йўналиши консалтинг компаниялари ва тадбиркорлик субъектлари дуч келаётган тизимли муаммоларни аниқлаш ҳамда уларни ҳал этиш бўйича амалий таклифлар тайёрлашни қамраб олади.
Халқаро ҳамкорликни кенгайтириш мақсадида ассоциация Европа тикланиш ва тараққиёт банки, шунингдек, консалтинг ва солиқ маслаҳатлари соҳасида фаолият юритувчи етакчи Европа ва халқаро ташкилотлар билан ҳамкорлик алоқаларини йўлга қўйишни режалаштирмоқда.
Учрашув якунида соҳа вакиллари хизматлар сифатини халқаро даражага олиб чиқиш, компаниялар ўртасидаги ҳамкорликни мустаҳкамлаш ва миллий консалтинг бозорини янада ривожлантириш масалалари юзасидан фикр алмашди.
