Тошкент, Ўзбекистон (UzDaily.uz) — Ўзбекистон ва Американинг GE Aerospace компанияси авиация соҳаси мутахассисларини тайёрлаш ва уларнинг малакасини оширишга қаратилган таълим дастурларини биргаликда ишлаб чиқишга келишиб олди.
Бу ҳақда 19 октябрь куни Самарқандда Ўзбекистон инвестициялар, саноат ва савдо вазири Лазиз Қудратовнинг GE Aerospace компаниясининг глобал тижорий савдолар бўйича вице-президенти Маҳендра Р. Наир билан учрашуви якунлари бўйича маълум бўлди.
Томонлар соҳада малакали мутахассисларга бўлган талаб ортиб бораётганини инобатга олган ҳолда, авиация кадрларини тайёрлаш соҳасидаги ҳамкорлик истиқболларини муҳокама қилди.
Музокаралар якунида янги кадрларни тайёрлаш ва амалдаги мутахассисларнинг касбий малакасини оширишга йўналтирилган таълим дастурларини биргаликда ишлаб чиқиш бўйича келишувга эришилди.
