Ўзбекистонда банк иловаларида рўйхатдан ўтиш қоидалари ўзгарди
Тошкент, Ўзбекистон (UzDaily.uz) — Ўзбекистонда фуқаролар банкларнинг мобил иловаларида рўйхатдан ўтиш ва уларга банк карталарини яқин қариндошига расмийлаштирилган телефон рақами орқали боғлаш имкониятига эга бўлади. Ахборот ва киберхавфсизлик талабларига киритилган тегишли ўзгартишлар Адлия вазирлиги томонидан 2026 йил 14 августда рўйхатдан ўтказилди. Бу ҳақда Ўзбекистон Адлия вазирлиги хабар берди.
Ўзгартишлар кредит ва тўлов ташкилотлари ҳамда тўлов тизимлари операторлари томонидан жисмоний шахсларга молиявий хизматларни масофадан кўрсатишда ахборот ва киберхавфсизликни таъминлаш, шунингдек, фирибгарликнинг олдини олиш бўйича минимал талаблар тўғрисидаги Низомга киритилди. Ҳужжат 3759-1-сон билан рўйхатдан ўтказилган.
Янги қоидаларга кўра, рўйхатдан ўтиш учун ота-она, ака-ука, опа-сингил, ўғил, қиз ёки турмуш ўртоғи номига расмийлаштирилган телефон рақамидан фойдаланиш мумкин. Бу тартиб турмуш ўртоқнинг ота-онаси, ака-укаси, опа-сингиллари ва фарзандларига ҳам татбиқ этилади. Яқин қариндошлик мавжудлиги ҳақидаги маълумот тегишли тизимда автоматик равишда тасдиқланади.
Банклар, шунингдек, мобил иловалар орқали амалга ошириладиган ва код ёрдамида тасдиқлаш талаб этилмайдиган пул ўтказмаларининг максимал миқдорини белгилайди.
Фойдаланувчиларни зарарли дастурий таъминот ва мобиль қурилмаларга масофадан киришдан ҳимоя қилиш бўйича қўшимча чоралар ҳам белгиланди. Бундай ҳолатлар аниқланганда фойдаланувчига нафақат SMS-хабар, балки PUSH-билдиришнома ҳам юборилади.
Мобил банк иловасига бошқа қурилмадан кирилганда, унга боғланган банк карталари вақтинча блокланади. Уларни қайта фаоллаштириш учун операцияни код ёрдамида тасдиқлаш талаб этилади.
Бундан ташқари, мобил илова орқали пул маблағларини ўтказишда фойдаланувчига нафақат жўнатувчининг маълумотлари, балки маблағни қабул қилувчининг исми ва фамилияси ҳам кўрсатилади. Бунда қабул қилувчининг шахсий маълумотларининг бир қисми яширилади.
