Тошкент, Ўзбекистон (UzDaily.uz) — Ўзбекистон ва Халқаро валюта жамғармаси (ХВЖ) иқтисодий ислоҳотлар, давлат молиясини бошқариш ва фискал сиёсат самарадорлигини ошириш масалалари бўйича ҳамкорликни давом эттиришга келишиб олди.
Ушбу масалалар 2026 йил 16 октябрь куни Бангкокда Ўзбекистон Бош вазири ўринбосари — иқтисодиёт ва молия вазири Жамшид Қўчқоровнинг ХВЖнинг Яқин Шарқ ва Марказий Осиё департаменти директори Жиҳад Азур билан учрашувида муҳокама қилинди. Бу ҳақда Ўзбекистон Иқтисодиёт ва молия вазирлигининг Ахборот хизмати ва коммуникациялар бошқармаси хабар берди.
Музокаралар ХВЖ ва Жаҳон банкининг йиллик йиғилишлари доирасида бўлиб ўтди. Унда жамғарманинг тегишли департаменти директори ўринбосари Танос Арванитис, Ўзбекистон Марказий банки раисининг ўринбосари Нодирбек Очилов, иқтисодиёт ва молия вазирининг маслаҳатчиси Жасур Қаршибоев ҳамда бошқа идоралар вакиллари ҳам иштирок этди.
Томонлар Ўзбекистондаги жорий иқтисодий ва молиявий жараёнлар, мамлакат ривожланишининг ўрта муддатли истиқболлари ҳамда жамғарма билан ҳамкорликни янада кенгайтириш имкониятларини кўриб чиқдилар.
Муҳокамаларнинг асосий мавзуларидан бири мамлакатда амалга оширилаётган иқтисодий ўзгаришларни қўллаб-қувватлаш бўлди. Иштирокчилар давлат молиясини бошқаришни такомиллаштириш ва фискал сиёсат самарадорлигини ошириш юзасидан фикр алмашдилар.
Давлат харажатларини таҳлил қилиш воситаларини ривожлантириш, бюджетни режалаштириш ва прогнозлаш тизимини такомиллаштириш масалаларига алоҳида эътибор қаратилди. Шунингдек, ХВЖнинг техник кўмагида фискал қарорларнинг иқтисодий ва ижтимоий таъсирини баҳолаш ёндашувлари муҳокама қилинди.
Ҳамкорликнинг бошқа йўналишлари сифатида давлат корхоналарини хусусийлаштириш ва трансформация қилиш, пенсия тизимини ислоҳ этиш, солиқ ва божхона маъмуриятчилигини такомиллаштириш, шунингдек, пул-кредит сиёсати самарадорлигини ошириш қайд этилди.
Учрашув якунлари бўйича томонлар ўзаро манфаатли ҳамкорликни ривожлантиришни давом эттириш ва кўриб чиқилган масалалар юзасидан фикр алмашиб боришга келишиб олдилар.
