Тошкент, Ўзбекистон (UzDaily.uz) — Ўзбекистон Бош вазир ўринбосари, иқтисодиёт ва молия вазири Жамшид Қўчқоров 6 октябрь куни Осиё тараққиёт банкининг (ОТБ) Ўзбекистондаги ваколатхонаси раҳбари Канокпан Лао-Арайя билан учрашув ўтказди.
Музокараларда, шунингдек, ОТБ мамлакат операциялари раҳбари Мирзо Искандар Гулямов, банкнинг катта иқтисодчиси Шерзод Акбаров ва томонларнинг бошқа вакиллари иштирок этди.
Учрашувда ҳамкорликни кенгайтириш, амалга оширилаётган қўшма ташаббусларни рўёбга чиқариш ва янги лойиҳаларни тайёрлаш масалаларига асосий эътибор қаратилди.
Муҳокаманинг алоҳида йўналишларидан бири яримўтказгичлар саноати ва микроэлектроникани ривожлантириш бўлди.
Томонлар Ўзбекистоннинг инновацион салоҳиятини ошириш, шунингдек, ушбу йўналишларни ривожлантириш учун халқаро тажриба ва техник кўмакни жалб қилиш имкониятларини кўриб чиқди.
Бундан ташқари, учрашув иштирокчилари сунъий интеллект технологияларини иқтисодий жараёнларга жорий этиш ва рақамли трансформацияни жадаллаштириш масалаларини муҳокама қилди.
Кун тартибидан давлат-хусусий шериклик асосида амалга оширилаётган инфратузилмавий ва ижтимоий-иқтисодий лойиҳалар ҳам ўрин олди.
Томонлар бундай ташаббусларда хусусий сектор иштирокини кенгайтириш имкониятларини кўриб чиқди.
Учрашув якунлари бўйича Ўзбекистон ва ОТБ мамлакатнинг иқтисодий ва технологик ривожланишига қаратилган янги ташаббуслар устида амалий ҳамкорлик ва қўшма ишларни давом эттириш ниятини тасдиқлади.
