Тошкент, Ўзбекистон (UzDaily.uz) — 2027 йил 1 январдан бошлаб Ўзбекистондаги давлат тиббиёт муассасалари тиббий ва ёрдамчи хизматларни хусусий сектордан аутсорсингнинг янги тартиби асосида харид қилади.
Ушбу тартиб Президентнинг 2026 йил 4 ноябрдаги «Соғлиқни сақлаш тизимини ривожлантиришда хусусий сектор иштирокини янада кенгайтириш чора-тадбирлари тўғрисида»ги ПҚ-392-сон қарори билан жорий этилмоқда. Бу ҳақда Ўзбекистон Республикаси Қонунчилик маълумотлари миллий базаси хабар берди.
2030 йилга қадар аутсорсинг асосида харид қилинадиган клиник ва ёрдамчи хизматлар улушини босқичма-босқич 30 фоизга етказиш режалаштирилган. Яна бир мақсад — камида бешта йирик тиббиёт ташкилотига нуфузли хорижий компаниялар ва профессионал бошқарувчилар жамоаларини жалб қилиш.
Аутсорсинг шартномалари хизмат хусусияти ва ижрочининг инвестициялари ҳажмини ҳисобга олган ҳолда беш йилгача бўлган муддатга тузилади.
Айрим ҳолларда инвестицияларнинг ўзини қоплаш муддатидан келиб чиқиб, Соғлиқни сақлаш вазирлигининг хулосаси асосида шартномани ўн йилгача бўлган муддатга тузиш мумкин.
Янги тартиб жорий этилгунига қадар амал қилиш муддати тугайдиган лойиҳаларни 2027 йил охиригача узайтиришга рухсат берилади.
Тиббиёт муассасаларининг бино ва хоналари иқтисодий жиҳатдан асосланган ҳамда хизмат нархида ҳисобга олинган тақдирда ижрочиларга текин фойдаланиш учун берилади.
2027 йилдан бошлаб соғлиқни сақлаш соҳасида давлат ва хусусий сектор иштироки соҳани ривожлантиришнинг узоқ ва қисқа муддатли мастер-режалари асосида йўлга қўйилади. Давлат томонидан кафолатланган тиббий ёрдамни кўрсатиш учун зарур бўлган муассасалар давлат тасарруфида қолади.
Уларнинг қувватлари аҳолининг ҳақиқий эҳтиёжларига мутаносиб равишда ривожлантирилади. Катта капитал маблағ талаб қиладиган янги муассасалар, қоида тариқасида, давлат-хусусий шериклик асосида ташкил этилади.
Катта инвестиция талаб қилмайдиган ва хусусий секторда рақобатли бозор шаклланган хизматлар давлат харидлари тўғрисидаги қонунчилик асосида аутсорсингга берилади.
Профессионал бошқарувчилар, қоида тариқасида, тиббиёт муассасаларини бошқариш тажрибаси, молиявий барқарорлиги ва бошқарув салоҳиятини ҳисобга олган ҳолда очиқ танлов асосида сараланади. Уларнинг фаолияти ҳар йили асосий самарадорлик кўрсаткичлари (KPI) бўйича баҳоланади.
Баҳолаш натижалари шартномани узайтириш, қайта кўриб чиқиш ёки бекор қилиш учун асос бўлади.
2027 йил 1 апрелга қадар «Тиббиёт аутсорсинги» электрон ахборот тизими ишга туширилади. Унда лойиҳалар, ижрочилар ва шартномаларнинг ягона реестри юритилади.
Тизим хизматлар ҳажми ва сифатини, тўловларни ҳамда мажбуриятларнинг бажарилишини кузатиб боради. Харидлар тўғрисидаги маълумотлар эса давлат харидлари тизимларидан автоматик равишда келиб тушади.
Шу муддатга қадар Бош прокуратура Соғлиқни сақлаш вазирлиги ва Давлат активларини бошқариш агентлиги билан биргаликда тиббиёт муассасалари бинолари, хоналари ва ер участкаларини ижарага бериш бўйича тузилган шартномаларни тўлиқ хатловдан ўтказади. Хатлов натижалари бўйича қонун бузилишига йўл қўйилган ҳолда тузилган шартномалар ва объектлардан мақсадсиз фойдаланиш ҳолатлари юзасидан Вазирлар Маҳкамасига таклифлар киритилади.
2027 йилдан бошлаб Соғлиқни сақлаш вазирлиги ҳар йили 1 ноябрга қадар хусусий инвестицияларни жалб қилиш ва давлат-хусусий шериклик асосида амалга ошириш учун устувор лойиҳалар рўйхатини ўз веб-сайтида эълон қилиб боради.
Вазирлик ҳузурида тиббиёт муассасаларини лойиҳалаштиришга оид шаҳарсозлик ва санитария нормаларини қайта кўриб чиқиш ҳамда уларни халқаро стандартларга мувофиқлаштириш бўйича лойиҳа офиси ташкил этилади.
