Тошкент, Ўзбекистон (UzDaily.uz) — 2027 йил 1 январдан бошлаб давлат маблағлари ҳисобидан молиялаштириладиган объектларда пудрат ташкилотларининг бошқа харажатлари смета қийматининг (тўғридан-тўғри харажатларнинг) 20 фоизи миқдорида, зарур фойда эса 7 фоиз миқдорида белгиланади.
Мазкур тартиб 2026 йил 21 октябрдаги 583-сонли ҳукумат қарори билан белгиланди.
Ҳужжат билан қурилиш объектларининг шартномавий жорий нархларини ҳисоблашда пудрат ташкилотларининг бошқа харажатларини аниқлаштириш тартиби тўғрисидаги низом тасдиқланди. Бу ҳақда Ўзбекистон Савдо-саноат палатаси хабар берди.
Янги қоидалар бюджет тизими маблағлари ҳисобидан амалга ошириладиган қурилиш, реконструкция ва таъмирлаш ишларига татбиқ этилади. Улар устав капиталида давлат улуши 50 фоиз ва ундан ортиқ бўлган хўжалик жамиятларига ҳам тааллуқли.
Қоидалар лойиҳа-смета ҳужжатларини ишлаб чиқиш ва объектларнинг бошланғич қийматини белгилашда қўлланилади.
Қурилиш соҳаси ходимларининг меҳнатига ҳақ тўлаш миқдори бир киши-соат учун республика бўйича меҳнатга ҳақ тўлашнинг энг кам миқдорининг 5 фоизи даражасида, ижтимоий солиқни ҳисобга олган ҳолда белгиланади. Пудратчиларнинг бошқа ишлаб чиқариш харажатлари тўғридан-тўғри харажатлар суммасининг 2,5 фоизини ташкил этади. Тоғли, чўл ва бориш қийин бўлган ҳудудлардаги объектлар учун эса бу кўрсаткич 5 фоиз этиб белгиланади.
Тўғридан-тўғри шартномалар бўйича пудратчиларнинг бошқа харажатларини ҳисоблаш, текшириш ва тасдиқлаш ишлари «Шаффоф қурилиш» миллий ахборот тизими орқали электрон шаклда амалга оширилади.
Бир календарь йилдан кўп бўлмаган муддат давомида фаолият юритган ҳамда баланс кўрсаткичлари ва молиявий ҳисоботларини тақдим этмаган пудрат ташкилотлари учун бошқа харажатлар смета қийматининг 10 фоизи, зарур фойда эса 7 фоизи миқдорида қабул қилинади.
Бошқа ишлаб чиқариш харажатлари учун маблағлар амалда бажарилган ишлар ҳажми ва қийматидан келиб чиқиб ажратилади.
Тендер натижаларига кўра тузилган шартномаларда шартнома амал қиладиган даврда пудратчининг бошқа харажатлари миқдорини ўзгартиришга йўл қўйилмайди. Бундан солиқ қонунчилиги ўзгарган ҳолатлар мустасно.
Пудрат ташкилотлари кесимида бошқа харажатлар миқдори ҳақидаги маълумотлар «Шаффоф қурилиш» тизимида эълон қилиб борилади.
