Тошкент, Ўзбекистон (UzDaily.uz) — Ўзбекистонда «Ўзбекистон Республикасининг Конституциявий суди тўғрисида»ги янги конституциявий қонун қабул қилинди.
2026 йил 14 октябрда қабул қилинган ЎРҚ-1181-сон ҳужжат Конституциявий суднинг ваколатлари, судьяларни сайлаш тартиби ва қабул қилинган қарорларнинг кучга кириш қоидаларини белгилайди. Бу ҳақда «Ҳуқуқий ахборот» канали хабар берди.
Қонунга мувофиқ, Конституциявий суд қонунлар, Олий Мажлис палаталарининг қарорлари, Президентнинг фармон ва қарорлари, шунингдек, Ҳукумат ҳамда маҳаллий давлат ҳокимияти органларининг қарорлари Конституцияга мувофиқлигини текширади.
Суднинг ваколатларига Қорақалпоғистон Республикаси қонунларининг Ўзбекистон қонунларига мувофиқлигини текшириш ҳам киради. Бундан ташқари, Олий суд ташаббуси билан киритилган норматив-ҳуқуқий ҳужжатларнинг Конституцияга мувофиқлиги тўғрисидаги мурожаатлар ҳам кўриб чиқилади.
Конституциявий суд ўз ваколатлари доирасида Конституция ва қонунларга шарҳ бериш ҳуқуқига эга.
Ҳужжатга кўра, Конституциявий суд судьялари 10 йил муддатга сайланади. Бунда ҳар бир судья алоҳида сайланади. Суд таркиби раис ва унинг ўринбосарини ҳам қўшган ҳолда тўққиз нафар судьядан иборат бўлади.
Конституциявий суднинг қарорлари ва хулосалари расман эълон қилинган кундан эътиборан кучга киради.
Қонун расман эълон қилинган кундан бошлаб кучга киради. Шу билан бирга, унинг айрим нормалари, жумладан, 29-модда, 58-модданинг иккинчи қисми ва 59-модда 2028 йил 1 январдан амал қила бошлайди.
