Тошкент, Ўзбекистон (UzDaily.uz) — Октябрь ойида Ўзбекистоннинг олтин-валюта захиралари 2,96 миллиард долларга ёки 4,5 фоизга камайди. 1 ноябрь ҳолатига кўра, улар 63,63 миллиард долларни ташкил этди. Бу ҳақда Марказий банк хабар берди.
Захиралар бундан паст даражага сўнгги марта 2025 йил декабрь ойида тушган бўлиб, ўшанда улар 61,23 миллиард долларга тенг эди.
Захиралар кетма-кет иккинчи ой қисқармоқда. Сентябрь ойида улар 5,55 миллиард долларга — 72,13 миллиард доллардан 66,59 миллиард долларгача камайган эди. Икки ой давомида мамлакат захиралари 8,51 миллиард долларга ёки 11,8 фоизга қисқарди.
Марказий банк октябрь ойидаги пасайишнинг асосий сабаби сифатида олтин нархининг арзонлашганини кўрсатмоқда. Бир ой давомида бир трой унция олтиннинг нархи 4188,75 доллардан 3981,10 долларга тушди. Бу 207,65 долларга ёки қарийб 5 фоизга арзонлашишни англатади. Регулятор ҳисоб-китобларига кўра, нархнинг пасайиши захиралар қийматини 3 миллиард долларга камайтирган.
Олтин захирасининг пул қиймати эса бундан камроқ — 2,04 миллиард долларга қисқариб, 60,09 миллиард доллардан 58,04 миллиард долларга тушди. Қийматнинг қайта баҳоланиши натижасида юзага келган йўқотишларнинг бир қисми захиралардаги олтиннинг физик ҳажми кўпайгани ҳисобига қопланди.
Октябрь ойида захираларга қарийб 236 минг трой унция ёки тахминан 7,3 тонна олтин қўшилди. Натижада захиралардаги олтиннинг умумий ҳажми бир ой аввалги 14,34 миллион унциядан 14,58 миллион унцияга етди. Бу тахминан 453,5 тоннани ташкил этади.
2013 йилдан буён статистика юритила бошланганидан бери захираларда бундай ҳажмдаги олтин қайд этилмаган. Бунгача бўлган рекорд кўрсаткич — қарийб 446 тонна — 1 октябрь ҳолатига қайд этилган эди. Сентябрь ойида олтин захираси тахминан 7,3 тоннага, августда эса 8 тоннага кўпайган.
Октябрь ойида валюта активлари олтин захираларига нисбатан анча кўпроқ қисқарди: улар 5,93 миллиард доллардан 5,01 миллиард долларгача, яъни 15,5 фоизга камайди. Натижада олтиннинг умумий захиралардаги улуши 90,2 фоиздан 91,2 фоизга кўтарилди.
