Тошкент, Ўзбекистон (UzDaily.uz) — «Ўзатом» агентлиги ва Янги тараққиёт банки (ЯТБ) Ўзбекистонда паст углеродли энергетика секторини ривожлантириш лойиҳаси учун экологик ва ижтимоий чораларни бошқаришнинг асосий моделини тайёрлашга бағишланган семинар ўтказди. Тадбир 9 ноябрь куни бўлиб ўтди.
Учрашув давомида иштирокчилар лойиҳанинг асосий параметрлари, уни амалга оширишнинг экологик ва ижтимоий жиҳатлари, шунингдек, ЯТБнинг эҳтимолий таъсирларни бошқариш бўйича ёндашувларини кўриб чиқди. Экологик ва ижтимоий чораларни бошқариш асосий моделининг тузилмаси ҳамда намунавий шаклига алоҳида эътибор қаратилди.
Бундан ташқари, экспертлар «Росатом» давлат корпорациясининг атом электр станцияларини қуриш ва улардан фойдаланиш лойиҳаларининг ESG мезонлари бўйича сифатини баҳолаш тажрибасини, шунингдек, Ўзбекистондаги интеграциялашган станциянинг иқлим самарадорлигини муҳокама қилди.
Семинарда ЯТБ, «Росатом» ва экологик ҳамда ижтимоий бошқарув соҳасидаги мустақил мутахассислар вакиллари иштирок этди.
«Ўзатом»нинг умумлаштирилган ахборот, таҳлил ва стратегик режалаштириш бўлими раҳбари — маслаҳатчиси Розалия Камаева энергетика лойиҳаларини амалга оширишда экологик ва ижтимоий стандартларга ёндашувларни мувофиқлаштириш ҳамда халқаро амалиётни қўллаш муҳимлигини таъкидлади.
ЯТБ Евроосиё минтақавий маркази бош директори Андрей Бокарев асосий моделни тайёрлаш лойиҳанинг барқарор ривожланишини таъминлашдаги муҳим босқич эканини қайд этди. Унинг сўзларига кўра, банк тамойиллари экологик ва ижтимоий хавфларни тизимли равишда бошқариш имконини беради.
«Росатом»нинг барқарор ривожланиш департаменти директори Полина Лион эса ESG соҳасидаги юқори стандартларга мувофиқлик атом электр станцияларини қуриш ва улардан фойдаланиш лойиҳаларининг ажралмас қисми эканини таъкидлади.
У, шунингдек, корпорация тажрибаси ёндашувларни халқаро амалиёт билан таққослаш ва интеграциялашган атом станцияларининг иқлим самарадорлигини баҳолашда муҳим аҳамиятга эга эканини қайд этди.
