Тошкент, Ўзбекистон (UzDaily.uz) — 2026 йил сентябрь ойида Ўзбекистонда миллий валютадаги муддатли омонатлар бўйича ўртача тортилган номинал фоиз ставкаси 17,2 фоизни ташкил этди. Бу ўтган йилнинг сентябрь ойига нисбатан 2,1 фоиз пунктга паст, август ойидаги кўрсаткич билан эса бир хил. Бу ҳақда Ўзбекистон Республикаси Марказий банки маълум қилди.
Ушбу кўрсаткич банклар томонидан жисмоний ва юридик шахслардан жалб қилинган барча муддатли омонатларни қамраб олади. Бир йилгача бўлган муддатли омонатлар бўйича ўртача ставка 14,2 фоизни ташкил этиб, ўтган йилги даражадан 3,4 фоиз пунктга пасайди. Бир йилдан ортиқ муддатли омонатлар бўйича эса ставка 1,7 фоиз пунктга тушиб, 18,1 фоизга етди.
Жисмоний шахсларнинг муддатли омонатлари бўйича ставка август ойидаги даражада сақланиб, 18,4 фоизни ташкил этди. Бир йил давомида ушбу кўрсаткич 2,9 фоиз пунктга пасайди.
Аҳолининг қисқа муддатли жамғармалари бўйича ставкалар энг кўп пасайди: бир йилгача бўлган омонатлар ставкаси 5,1 фоиз пунктга тушиб, 15,6 фоизни ташкил қилди. Фуқароларнинг узоқ муддатли омонатлари бўйича ставка эса 18,8 фоизга тенг бўлди.
Юридик шахслар учун ўртача ставка бир ойда 0,5 фоиз пунктга, бир йилда эса 2,1 фоиз пунктга пасайиб, 15 фоизни ташкил этди. Уларнинг бир йилгача бўлган омонатлари бўйича ставка 13,3 фоиз, бир йилдан ортиқ муддатли омонатлари бўйича эса 16,1 фоиз бўлди.
Шу билан бирга, миллий валютадаги омонатлар бўйича реал фоиз ставкалари ошди. Реал ставка номинал фоиз ставкасидан инфляция кутилмаларини айириш орқали ҳисобланади ва омонатнинг ҳақиқий даромадлилигини акс эттиради.
Марказий банк маълумотларига кўра, реал ставкаларнинг нисбатан юқори даражада бўлиши иқтисодиётда инфляция жараёнларининг барқарорлашуви билан боғлиқ. Жисмоний шахслар учун реал ставка августдаги 7,9 фоиздан сентябрда 8,9 фоизга кўтарилди. Бу ўтган йилги кўрсаткичдан 0,6 фоиз пунктга юқори. Юридик шахслар учун эса ушбу кўрсаткич 5,3 фоизни ташкил этиб, бир йилда 0,4 фоиз пунктга ошди.
Сентябрь ойида аҳолининг инфляция кутилмалари 8,7 фоизга, бизнес вакиллариники эса 9,2 фоизгача пасайди. Бир йил давомида улар мос равишда 3,3 ва 2,5 фоиз пунктга камайди.
Хорижий валютадаги муддатли омонатлар бўйича ўртача ставка 4,4 фоизни ташкил этди. Бу август ойидаги кўрсаткичдан 1,1 фоиз пунктга, ўтган йилги даражадан эса 0,7 фоиз пунктга паст.
Бир йилгача бўлган муддатли валюта омонатлари бўйича ставка 2,6 фоизгача пасайди, узоқ муддатли омонатлар бўйича эса 5,7 фоизгача кўтарилди.
Жисмоний шахсларнинг валютадаги омонатлари ўртача 5,4 фоиз даромад келтирди. Бу бир йил аввалги кўрсаткичдан 0,3 фоиз пунктга юқори. Фуқароларнинг узоқ муддатли омонатлари бўйича ставка 5,8 фоизга етди. Юридик шахсларнинг валютадаги омонатлари бўйича ўртача ставка эса бир ойда 2,9 фоиз пунктга пасайиб, 2,8 фоизни ташкил қилди.
Уларнинг бир йилгача бўлган муддатли омонатлари бўйича ставка 2,5 фоиз, бир йилдан ортиқ муддатли омонатлари бўйича эса 4,4 фоиз бўлди.
