Тошкент, Ўзбекистон (UzDaily.uz) — Ўзбекистонда техноген хусусиятга эга фавқулодда вазиятлар оқибатида жабр кўрган фуқароларга молиявий ёрдам кўрсатиш механизми белгиланди.
Бир марталик компенсация миқдори ҳодиса оқибатларига қараб белгиланади. Ҳалок бўлганларнинг оилаларига 220 миллион сўмгача, жабрланган фуқароларга эса 88 миллион сўмгача тўлов ажратилиши мумкин.
Тегишли низом аҳолига етказилган зарарни баҳолаш ва уни қоплаш тартибини белгилайди. Ҳужжатда мамлакатнинг туман ва шаҳар ҳокимликлари ҳузурида махсус жамғармалар ташкил этиш ҳам назарда тутилган.
Моддий ёрдам миқдори тўғрисидаги қарорни комиссия қабул қилади. Тўлов суммасини белгилашда комиссия уни иқтисодиёт ва молия органларининг ҳудудий бўлинмалари билан келишиши лозим.
Тўловларнинг энг юқори миқдори жабрланганлар тоифасига қараб белгиланган. Ҳалок бўлган фуқароларнинг оилаларига 500 баравар базавий ҳисоблаш миқдоригача, яъни 220 миллион сўмгача компенсация бериш назарда тутилган. Ҳалок бўлган шахснинг турмуш ўртоғи, фарзандлари, ота-онаси ва қарамоғидаги шахслар ушбу маблағни олиш ҳуқуқига эга. Ажратилган сумма улар ўртасида тенг тақсимланади.
Оғир тан жароҳати олган фуқароларга 200 БҲМгача (88 миллион сўм) миқдорида ёрдам кўрсатилади. Ўртача оғирликдаги жароҳатлар учун энг юқори тўлов 150 БҲМни (66 миллион сўм), енгил тан жароҳатлари учун эса 100 БҲМни (44 миллион сўм) ташкил этади.
Компенсацияларни молиялаштириш фавқулодда вазият юзага келишига айби белгиланган тартибда аниқланган юридик шахслар ёки уларнинг мансабдор шахслари зиммасига юклатилади.
