Тошкент, Ўзбекистон (UzDaily.uz) — Ўзбекистон ва Тожикистон ландшафтларни барқарор бошқариш ҳамда ўрмон ёнғинларининг олдини олиш бўйича икки қўшма ният декларациясини имзолади. Ҳужжатлар COP31 иқлим конференцияси доирасида имзоланди. Бу ҳақда Ўзбекистон Экология ва иқлим ўзгариши миллий қўмитаси хабар берди.
Декларациялар «Марказий Осиё ландшафтлари барқарорлигини ошириш бўйича минтақавий ҳамкорлик» номли юқори даражадаги тадбир якунлари бўйича қабул қилинди. Унда минтақа давлатлари, халқаро ташкилотлар ва тараққиёт бўйича ҳамкорлар вакиллари иштирок этди.
Биринчи ҳужжат ландшафтларни барқарор бошқариш ва экотизимлар барқарорлигини ошириш учун табиатга асосланган ечимларни қўллашни назарда тутади. Иккинчи декларация эса ўрмон ёнғинлари ҳақида минтақавий огоҳлантириш тизимини шакллантиришга қаратилган.
Тадбир иштирокчилари Марказий Осиёдаги экологик муаммолар трансчегаравий хусусиятга эга эканини таъкидлади. Асосий таҳдидлар қаторида ерларнинг деградацияси, ўрмон ёнғинлари, инвазив турларнинг тарқалиши ва биохилма-хилликнинг қисқариши қайд этилди.
Шунингдек, алоҳида муҳофаза қилинадиган табиий ҳудудларга тушаётган босим ортиб бораётгани муҳокама қилинди. Ушбу муаммоларни ҳал этиш учун мувофиқлаштирилган ёндашувлар, қўшма мониторинг ва минтақа давлатлари ҳаракатларини мувофиқлаштириш зарурлиги таъкидланди.
Келгусида Қозоғистон, Туркманистон ва Қирғиз Республикаси томонидан ҳам яна иккита қўшма ният декларациясини имзолаш кўзда тутилган.
Тадбир давомида иштирокчиларга Жаҳон банки кўмагида амалга оширилаётган RESILAND CA+ минтақавий дастури тақдим этилди.
Дастур ландшафтларни тиклаш, табиий ресурсларни барқарор бошқариш ва Марказий Осиё мамлакатларининг иқлим ўзгаришига бардошлилигини оширишга қаратилган.
Дастурнинг минтақавий таркибий қисмини Марказий Осиё минтақавий экологик маркази (МОМЭМ) мувофиқлаштиради.
Ташкилот трансчегаравий ҳамкорликни ривожлантириш, тажриба алмашиш ва табиатни муҳофаза қилиш бўйича келишилган ёндашувларни жорий этишга кўмаклашади.
Иштирокчиларнинг баҳолашича, эришилган келишувлар халқаро ҳамкорлар ва молия институтларини жалб қилган ҳолда қўшма амалий лойиҳаларни амалга ошириш учун асос яратади.
