Тошкент, Ўзбекистон (UzDaily.uz) — Самарқанд ва Гулистон шаҳарларида Саудия Арабистонига умра зиёратини ноқонуний ташкил этиш билан боғлиқ иккита ҳолат аниқланди. Ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
Ўзбекистон Вазирлар Маҳкамасининг 2024 йил 12 октябрдаги 668-сон қарорига мувофиқ, умра сафарларини фақат махсус лицензияга эга ташкилотлар ташкил этиши мумкин. Белгиланган тартиб зиёратчиларнинг ҳуқуқларини ҳимоя қилиш, уларнинг хавфсизлигини таъминлаш ва сифатли хизмат кўрсатишни назарда тутади.
Биринчи ҳолат Самарқандда «Хавфсиз ва соғлом мамлакат» тезкор-профилактик тадбирлари давомида аниқланди.
Ички туризмга ихтисослашган туристик фирма ходими тегишли лицензия ва рухсат берувчи ҳужжатларсиз уч нафар фуқарони умра зиёратига юборишни таклиф қилган. Сафарни ташкил этиш учун у ҳар бир кишидан 1,2 минг доллардан, жами 3,6 минг доллар талаб қилган.
Эркак Давлат хавфсизлик хизмати Самарқанд вилояти бошқармаси ва вилоят ички ишлар бошқармаси ходимлари ҳамкорлигида ўтказилган тезкор тадбир давомида пулни олаётган вақтида ашёвий далиллар билан қўлга олинган.
Иккинчи ҳолат Гулистон шаҳрида қайд этилди. 1974 йилда туғилган эркак Тошкент шаҳрида фаолият юритувчи туристик фирма орқали уч нафар фуқарони диний маросимларни адо этиш учун Саудия Арабистонига юборишни ташкил этиш эвазига 3,3 минг доллар ва 1,2 млн сўм олган.
У Давлат хавфсизлик хизмати Сирдарё вилояти бошқармаси ҳамда Иқтисодий жиноятларга қарши курашиш департаментининг вилоят бошқармаси ходимлари ҳамкорлигида қўлга олинган.
Ҳар икки ҳолатда ҳам қонунчиликда белгиланган лицензиясиз зиёрат сафарини ташкил этишга уриниш ҳақида сўз бормоқда. Тергов ҳаракатлари давом этмоқда.
