Тошкент, Ўзбекистон (UzDaily.uz) — Ўзбекистон 2026 йилнинг январь–сентябрь ойларида 23 та мамлакатга жами 64,7 млн долларлик 206,3 минг тонна қовун ва тарвуз экспорт қилди.
Миллий статистика қўмитаси маълумотларига кўра, экспорт ҳажми ўтган йилнинг шу даврига нисбатан 22,9 минг тонна ёки 10 фоизга камайган.
Экспорт таркибида тарвузлар 139 минг тоннани, қовунлар эса 67,3 минг тоннани ташкил этган.
Маҳсулот етказиб беришнинг физик ҳажми камайганига қарамай, экспорт қиймати 2025 йилнинг январь–сентябрь ойларига нисбатан 8,2 млн долларга ёки 14,6 фоизга ошган.
Экспортнинг энг йирик йўналиши Россия бўлиб, ушбу мамлакатга 97,4 минг тонна маҳсулот етказиб берилган. Иккинчи ўринни 51,8 минг тонна билан Қозоғистон, учинчи ўринни эса 46,6 минг тонна билан Қирғизистон эгаллаган.
Беларусьга 3,2 минг тонна, Латвияга 2,1 минг тонна, Германияга 1,4 минг тонна, Тожикистонга эса 1,1 минг тонна қовун ва тарвуз экспорт қилинган.
Шунингдек, Украинага 947,7 тонна, Литвага 866,4 тонна ва Монголияга 290,9 тонна маҳсулот етказиб берилган. Қолган мамлакатлар ҳиссасига 698,3 тонна экспорт тўғри келган.
