Тошкент, Ўзбекистон (UzDaily.uz) — Uzbekistan Airways 2027 йил 5 апрелдан бошлаб Тошкент — Варшава — Тошкент йўналиши бўйича тўғридан-тўғри мунтазам авиақатновларни йўлга қўяди.
Парвозлар ҳафтасига икки марта — душанба ва пайшанба кунлари амалга оширилади. Авиачипталар савдоси бошлангани ҳақида авиакомпания матбуот хизмати хабар берди.
Рейслар HY221 ва HY222 рақамлари остида амалга оширилади. Тошкентдан учиш соат 04:25 га, Варшавага етиб бориш эса соат 08:05 га белгиланган. Қайтиш рейси Польша пойтахтидан соат 09:35 да йўлга чиқиб, Тошкентга соат 18:15 да етиб келади. Кўрсатилган вақтлар ҳар бир аэропортнинг маҳаллий вақти бўйича берилган.
Эълон чоп этилган вақтда авиачипталар нархи 4,715 млн сўмдан бошланмоқда.
Чипталарни Uzbekistan Airways авиакомпаниясининг расмий веб-сайти, мобил иловаси, сотув офислари ҳамда агентлари орқали харид қилиш мумкин.
