Тошкент, Ўзбекистон (UzDaily.uz) — Ўзбекистон инвестициялар, саноат ва савдо вазири Лазиз Қудратов 5 октябрь куни Япония Халқаро ҳамкорлик агентлиги (JICA) катта вице-президенти Кацура Миядзаки билан учрашув ўтказди.
Томонлар икки томонлама ҳамкорликнинг жорий ҳолати ва истиқболлари, амалга оширилаётган қўшма лойиҳаларни бажариш жараёни ҳамда янги ташаббусларни тайёрлаш масалаларини кўриб чиқдилар.
Эркин иқтисодий зоналарни (ЭИЗ) ривожлантиришга алоҳида эътибор қаратилди.
Учрашув иштирокчилари JICA томонидан ЭИЗларнинг мастер-режаларини тайёрлаш, хорижий инвестицияларни, жумладан, Япония компаниялари инвестицияларини жалб қилиш учун шароит яратиш борасида кўрсатилаётган техник кўмакни юқори баҳоладилар.
Музокаралар якунлари бўйича томонлар 2026–2030 йилларга мўлжалланган янги Ҳамкорлик дастурини имзоладилар. Ҳужжат 15 та истиқболли лойиҳани амалга оширишни назарда тутади.
Дастур доирасидаги ташаббуслар транспорт ва энергетика инфратузилмасини ривожлантириш, инсон капиталини ривожлантириш, соғлиқни сақлаш ҳамда қишлоқ хўжалиги соҳаларини қамраб олади.
