Тошкент, Ўзбекистон (UzDaily.uz) — Ўзбекистон Омонатларни кафолатлаш агентлиги ва Италиянинг Банклараро депозитларни ҳимоя қилиш жамғармаси (FITD) икки томонлама ҳамкорлик тўғрисидаги меморандумни имзолади.
Ҳужжат омонатчилар манфаатларини ҳимоя қилиш соҳасидаги ҳамкорликни ривожлантириш ва миллий депозитларни кафолатлаш тизимларини такомиллаштиришга қаратилган.
Меморандум 27 октябрь куни Берлинда Депозитларни суғурталовчилар халқаро ассоциациясининг (IADI) 25-йиллик умумий йиғилиши доирасида имзоланди.
Томонлар омонатчиларга компенсация тўловларини амалга оширишни ташкил этиш бўйича тажриба алмашиш, шунингдек, рисклар даражасини ҳисобга олган ҳолда бадалларни ҳисоблаш механизмларини такомиллаштиришни режалаштирмоқда.
Ҳамкорликнинг бошқа йўналишлари қаторига жамоатчиликни хабардор қилиш стратегияларини ривожлантириш, инвестиция сиёсати соҳасида тажриба алмашиш ва банклар фаолиятига аралашув механизмларини ўрганиш ҳам киради.
Ўзбекистон Омонатларни кафолатлаш агентлиги маълумотига кўра, келишув халқаро ҳамкорликни кенгайтириш, хорижий тажрибани ўрганиш ва мамлакатда омонатларни кафолатлаш тизимини янада такомиллаштиришга хизмат қилади.
