Тошкент, Ўзбекистон (UzDaily.uz) — Ўзбекистон Республикаси Истиқболли лойиҳалар миллий агентлиги (ИЛМА ) 26 октябрь куни «MONETEX» МЧЖга криптодўкон фаолиятини амалга ошириш учун лицензия берди. Бу ҳақда Истиқболли лойиҳалар миллий агентлиги хабар берди.
Лицензия криптоактивлар айланмаси соҳасида хизмат кўрсатувчи провайдерлар фаолиятини лицензиялаш тартиби тўғрисидаги низомга мувофиқ берилган. У ҳақидаги маълумотлар лицензияларнинг электрон реестрига киритилган.
Реестр маълумотларига кўра, компанияга CS №0021 лицензияси берилган. Унинг ягона таъсисчиси — Шерзод Қосимов. Компания Тошкент шаҳрининг Мирзо Улуғбек туманида рўйхатдан ўтган.
Янги лицензия ҳисобга олинганда, ИЛМА реестрида криптоактивлар айланмаси соҳасида хизмат кўрсатувчи провайдерларга тегишли 22 та лицензия мавжуд. Уларнинг эгалари 17 та компания ҳисобланади, чунки айрим компаниялар бир нечта сегментда фаолият юритиш учун лицензия олган.
Криптобиржа лицензиялари икки компанияга — «ASTERIUM» АЖ ва «COINPAY» МЧЖга берилган. Криптодепозитарий фаолияти учун эса олтита компания лицензияга эга: LOCKTON HUB, PAYNET CRYPTO, JAPAN DXT қўшма корхонаси, CITY PAY GATE, TGHAMYON ва ASTERIUM.
Энг кўп лицензияга эга сегмент — криптодўконлар. Реестрда уларнинг 14 та лицензияси қайд этилган. Агентлик улардан бештасининг фаолиятини олти ойга тўхтатган: CRYPTO EXPRESS фаолияти 1 июндан, CRYPTO MAGNAT фаолияти 1 сентябрдан, CRYPTOCORP, C-CASH ва T-FIRM фаолияти эса 2026 йил 1 октябрдан бошлаб тўхтатилган.
Ҳозирда чекловларсиз тўққизта криптодўкон фаолият юритмоқда: PAYNET CRYPTO, T-REX, CITY PAY GATE, C-BASE, ASTERIUM, UNEX PAYMENTS, NAQD-EX, COINPAY ва MONETEX.
2026 йилда агентлик иккита лицензияни бекор қилган. KOBEA GROUP компаниясининг криптобиржа лицензияси май ойида қайтариб олинган. CRYPTO MARKET криптодўконининг лицензияси эса сентябрь ойида бекор қилинган, чунки компания лицензия амал қилишини қайта тиклаш учун мурожаат қилмаган.
