Ўзбекистон ва Ҳиндистон Халқаро иқтисодий ҳамкорлик конференциясига тайёргарликни муҳокама қилишди

Тошкент, Ўзбекистон (UzDaily.uz) — 8 июнь куни Ўзбекистон Республикаси Инвестициялар, саноат ва савдо вазири ўринбосари Шоҳруҳ Гуламов Ҳиндистон элчиси Смита Пант билан учрашди.

Учрашувда савдо-иқтисодий ва сармоявий ҳамкорликни ривожлантириш, ўзаро манфаатли алоқаларни кенгайтириш ҳамда мавжуд имкониятлардан самарали фойдаланиш масалалари муҳокама қилинди.

Томонлар дўстона муносабатларнинг изчил ривожланиб бораётганини ва турли соҳалардаги ҳамкорликни кенгайтириш учун улкан салоҳият мавжудлигини таъкидлаб, шерикликни фаоллаштириш ва қўшма ташаббусларни қўллаб-қувватлаш юзасидан фикр алмашдилар.

18 июнь куни Тошкент шаҳрида ўтказилиши режалаштирилган Ўзбекистон-Ҳиндистон ҳукуматлараро комиссиясининг 14-йиғилишига тайёргарлик кўриш жараёни алоҳида кўриб чиқилди. Бўлажак тадбирнинг икки томонлама ҳамкорликни мустаҳкамлаш ва унинг амалий натижадорлигини оширишдаги аҳамияти қайд этилди.

Учрашув якунида конструктив мулоқотни давом эттириш ва алоқаларни янада ривожлантиришга ўзаро тайёр эканликлари билдирилди.