Ўзбекистон ва Афғонистон савдо айланмасини 5 миллиард долларга етказишни муҳокама қилишди

Тошкент, Ўзбекистон (UzDaily.uz) — Қобул шаҳрида Ўзбекистон Республикаси Бош вазири ўринбосари Жамшид Хўжаев бошчилигидаги делегация Афғонистон Бош вазирининг иқтисодий масалалар бўйича ўринбосари Мулла Абдул Ғани Бародар билан учрашди.

Учрашувда Афғонистон ва Ўзбекистон ўртасидаги иқтисодий, савдо, инвестиция ва транзит соҳаларидаги ҳамкорликни янада кенгайтириш масалалари муҳокама қилинди.

Афғонистон иқтисодий масалалар бўйича Бош вазири ўринбосари Қобул ва Тошкент ўртасидаги янада мустаҳкам ва барқарор муносабатлар нафақат икки мамлакатнинг иқтисодий манфаатларига хизмат қилиши, балки минтақавий барқарорликни таъминлашга ҳам ҳисса қўшишини таъкидлади.

Жамшид Хўжаев Ўзбекистон ва Афғонистон ўртасидаги икки томонлама савдо ҳажми сезиларли даражада ўсиб, 1,6 миллиард АҚШ долларига етганини маълум қилди.

У шунингдек, Ўзбекистон Афғонистондаги ўзбек инвесторлари томонидан бошланган лойиҳаларни жадаллаштириш, мавжуд муаммоларни ҳал этиш ва икки мамлакат иқтисодий тараққиётига хизмат қиладиган янги лойиҳаларни амалга оширишга тайёр эканини билдирди.

Шунингдек, делегация таркибидаги Ўзбекистон мутасаддилари Афғонистоннинг тегишли идоралари билан яқин ҳамкорлик қилиб, транспорт, энергетика, қишлоқ хўжалиги, банк, савдо ва иқтисодий алоқалар соҳаларидаги ҳамкорликни кенгайтириш, шунингдек, турли йўналишларда афғонистонлик мутахассисларнинг салоҳиятини ошириш ташаббусларини қўллаб-қувватлашини таъкидлади.

Учрашувда Фарғона вилояти ҳокими Хайрулло Бозоров ҳам иштирок этди.