Тошкент, Ўзбекистон (UzDaily.uz) — IT Park Uzbekistan 2026 йилда Осиё ва Океания мамлакатларининг технологик ассоциациялари ҳамда компанияларини бирлаштирувчи Asian-Oceanian Computing Industry Organization (ASOCIO) ташкилотига аъзо бўлди.
Аъзолик расмий равишда Startup & Venture Summit якунлари бўйича тасдиқланди. ASOCIO раиси Stan Singh-Jit IT Park Uzbekistan вакилига ташкилотга аъзолик тўғрисидаги расмий сертификатни топширди.
ASOCIO Осиё ва Океания мамлакатларидаги 25 та ихтисослашган ассоциацияни бирлаштиради ҳамда ахборот-коммуникация технологиялари соҳасида фаолият юритувчи 20 мингдан ортиқ компанияни қамраб олади.
IT Park Uzbekistan’нинг ташкилотга қўшилиши мамлакат технологик компанияларининг ASOCIO халқаро тармоғи иштирокчилари билан алоқалар ўрнатиши, ҳамкорлар топиши ва янги бозорларга чиқиши учун имкониятларни кенгайтиради.
Шунингдек, аъзолик халқаро ташаббусларда иштирок этиш ва минтақадаги технологик соҳа вакиллари билан ҳамкорлик қилиш имконини беради.
