Тошкент, Ўзбекистон (UzDaily.uz) — Тошкент вилояти ҳокими Зойир Мирзаев бошчилигидаги делегация 17 сентябрь куни Хитойга амалий ташриф доирасида Suntown Technology Group Co., Ltd. (SNTO) компаниясига борди. Томонлар ишлаб чиқариш ва инвестициявий ҳамкорлик истиқболлари ҳамда янги лойиҳаларни амалга ошириш масалаларини муҳокама қилди. Бу ҳақда Тошкент вилояти ҳокимлиги матбуот хизмати хабар берди.
SNTO компанияси 2003 йилда Чанша шаҳрида ташкил этилган бўлиб, алюминийни чуқур қайта ишлаш ва илғор материаллар ишлаб чиқаришга ихтисослашган.
Ташриф давомида Тошкент вилояти вакиллари компаниянинг ишлаб чиқариш қувватлари ва замонавий технологик жараёнлари билан танишди.
Юқори аниқликдаги алюминий фольгаси, саноат профиллари, енгил конструкциялар ва қурилиш учун алюминий қолип тизимларини ишлаб чиқаришга алоҳида эътибор қаратилди. Делегация вакиллари, шунингдек, ишлаб чиқаришда рақамли технологиялар ва ресурсларни тежовчи ечимларни қўллаш билан танишди.
Музокаралар давомида Тошкент вилоятида қурилиш учун замонавий алюминий қолип тизимлари ҳамда экологик тоза қадоқлаш маҳсулотлари ишлаб чиқаришни маҳаллийлаштириш имкониятлари кўриб чиқилди.
Шунингдек, илғор «яшил» технологияларни жорий этиш ва SNTO компаниясининг Марказий Осиё бозорига чиқиш имкониятларини кенгайтириш масалалари муҳокама қилинди.
Компаниянинг илмий-тадқиқот ва инновацион салоҳиятига ҳам алоҳида эътибор қаратилди.
Хусусан, янги лойиҳаларни амалга ошириш имкониятлари сифатида SNTO Миллий технология маркази ва докторантурадан кейинги илмий-тадқиқот станцияси фаолиятига эътибор қаратилди.
Ҳамкорликнинг истиқболли йўналишлари сифатида илғор технологияларни жорий этиш, ишлаб чиқаришни маҳаллийлаштириш ва компаниянинг янги бозорларга чиқиши белгиланди.
