Тошкент, Ўзбекистон (UzDaily.uz) — Бухоро вилояти божхона бошқармаси контрабандага қарши курашиш бўлими ходимлари республика ҳудудига олиб кирилиши тақиқланган катта миқдордаги никотинни ноқонуний равишда олиб киришга бўлган уринишнинг олдини олди. Бу ҳақда Бухоро вилояти божхона бошқармаси хабар берди.
Юк мамлакат ҳудудига импорт божхона режими асосида олиб кирилган. Бунда божхона ҳужжатларида маҳсулот парфюмерия маҳсулотлари ишлаб чиқариш учун хомашё сифатида декларация қилинган. Бироқ «Хавфларни бошқариш тизими» юкни «қизил йўлак» орқали ўтказиш учун йўналтирган ва шундан сўнг унга нисбатан божхона кўриги ўтказилган.
Текширув давомида махсус экспресс қурилма ёрдамида намуналар олинди. Уларнинг таҳлили натижасида декларацияда кўрсатилган маҳсулот аслида суюқ никотин экани аниқланди. Бу ҳолат Х. Сулаймонова номидаги Республика суд экспертизаси марказининг хулосаси билан ҳам тасдиқланди. Марказ олиб қўйилган модда асосан электрон сигареталар ишлаб чиқаришда қўлланиладиган суюқ никотин эканини аниқлаган.
Дастлабки маълумотларга кўра, олиб қўйилган никотиннинг умумий оғирлиги 70 килограммни ташкил этган, унинг қиймати эса 2 миллиард 100 миллион сўмга баҳоланган.
Айни пайтда иш бўйича барча процессуал ҳаракатлар якунланган. Олиб қўйилган товар суднинг тегишли қарори асосида белгиланган тартибда йўқ қилинади.
