Тошкент, Ўзбекистон (UzDaily.uz) — Қайта тикланувчи энергия манбалари ва кичик қувватли қуёш панеллари 2026 йил 12 ноябрь куни Ўзбекистонга 15,76 млн куб метр табиий газни тежаш имконини берди. Бу ҳақда Ўзбекистон Энергетика вазирлиги хабар берди.
Бир сутка давомида мамлакатда 266,1 млн кВт·соат электр энергияси ишлаб чиқарилди. Ушбу ҳажмнинг 59,1 млн кВт·соати ёки 22,2 фоизи қуёш, шамол ва гидроэлектр станциялари, шунингдек, кичик қувватли қуёш панеллари ҳиссасига тўғри келди.
Мазкур манбалардан электр энергияси ишлаб чиқарилиши атмосферага 33,9 минг тонна зарарли моддалар чиқарилишининг ҳам олдини олди.
Энергетика вазирлигида таъкидланишича, қуёш ва шамол электр станцияларида электр энергияси ишлаб чиқариш ҳажми об-ҳаво шароитига боғлиқ. Қуёш фаоллиги етарли бўлмаган ёки шамол тезлиги паст бўлган айрим кунларда уларнинг электр энергияси ишлаб чиқариш кўрсаткичлари камайиши мумкин.
Шу билан бирга, бундай станцияларда ишлаб чиқарилган ҳар бир киловатт-соат электр энергияси табиий газни тежаш, атроф-муҳитга таъсирни камайтириш ва энергетика ресурсларидан янада оқилона фойдаланишга хизмат қилади.
Электр энергетикаси тизимида қайта тикланувчи энергия манбалари улушининг ошиши мавжуд ёқилғидан самаралироқ фойдаланиш ва мамлакат энергетика хавфсизлигини мустаҳкамлашга ҳам ҳисса қўшади.
