Тошкент, Ўзбекистон (UzDaily.uz) — Халқаро меҳмонхона гуруҳи Minor Hotels EASYRENT PE компанияси билан 151 хонали NH Hotel Tashkent меҳмонхонасини очиш бўйича франчайзинг шартномасини имзолади.
Меҳмонхона 2027 йилнинг биринчи чорагида фаолият бошлайди. У гуруҳнинг Ўзбекистонда, шунингдек, МДҲ ва Марказий Осиё мамлакатларидаги биринчи объекти бўлади. Бу ҳақда Minor Hotels компаниясининг 2026 йил 11 ноябрдаги хабарномасида маълум қилинди.
Шартномани имзолаш маросими Тошкентда бўлиб ўтди. Унда Ўзбекистон Туризм қўмитаси раисининг ўринбосари, Minor Hotels раҳбарияти вакиллари, лойиҳа эгаси, меҳмонхонанинг бош менежери ҳамда маҳаллий ҳамкорлар иштирок этди.
Айни пайтда меҳмонхонада реконструкция ишлари олиб борилмоқда ва унинг концепцияси NH Hotels & Resorts бренди стандартларига мувофиқ янгиланмоқда. Ишлар якунланганидан сўнг меҳмонхонада стандарт хоналар, Deluxe тоифасидаги хоналар ва оилавий люксларни ўз ичига олган жами 151 та хона бўлади.
Меҳмонхона инфратузилмасидан ресторан, тренажёр зали ва музокаралар хонаси ҳам ўрин олади. Компания маълумотига кўра, объект Тошкент аэропортидан автомобилда тахминан 10 дақиқалик масофада жойлашган.
NH Hotels & Resorts бренди Minor Hotels портфелига киради ва юқори даражадаги меҳмонхона хизматлари сегментида фаолият юритади. Бренд Европа, Шимолий ва Жанубий Америкада намойиш этилган, шунингдек, Яқин Шарқ, Осиё ва Австралазиядаги иштирокини кенгайтирмоқда.
Minor Hotels Europe & Americas бош директори Гонсало Агиларнинг таъкидлашича, Ўзбекистон бозорига кириш гуруҳнинг Марказий Осиёдаги биринчи қадами бўлади. Унинг сўзларига кўра, франчайзинг модели меҳмонхона брендларининг янги бозорлардаги иштирокини кенгайтириш имконини беради.
NH Hotel Tashkent бош менежери Олеся Гильмееванинг қайд этишича, Minor Hotels билан ҳамкорлик гуруҳнинг халқаро тажрибасини маҳаллий бозор ҳақидаги билимлар билан бирлаштириш имконини беради.
Minor Hotels маълум қилишича, компания дунёнинг 67 мамлакатида 640 дан ортиқ меҳмонхона ва курортни бошқаради. Гуруҳ портфелига Anantara, Tivoli, NH Collection, nhow, Avani, NH ва Oaks брендлари киради.
