Тошкент, Ўзбекистон (UzDaily.uz) — Ўзбекистон инвестициялар, саноат ва савдо вазири Лазиз Қудратов 25 сентябрь куни Бокуда II Озарбайжон халқаро инвестиция форумида иштирок этди. Форум Озарбайжон Президенти Илҳом Алиев ҳомийлигида ўтказилмоқда.
Тадбирда ҳукуматлар, халқаро молия институтлари, инвестиция ва ишбилармон доираларнинг 3 мингдан ортиқ вакили рўйхатдан ўтган. Иштирокчилар қўшма лойиҳалар ва минтақалар ўртасида иқтисодий алоқаларни янада мустаҳкамлаш имкониятларини муҳокама қилмоқда.
«Глобал ўсишнинг келажаги: инвестициялар ва транспорт ўзаро боғлиқлиги» мавзусидаги панель муҳокамасида сўзга чиққан Лазиз Қудратов саноат кооперацияси, ўзаро инвестициялар, транспорт инфратузилмасини ривожлантириш, яшил энергетика, капитал бозори, рақамли иқтисодиёт ва инсон капитали каби ҳамкорликнинг асосий йўналишларини белгилаб берди.
Вазир Ўрта йўлак масаласига алоҳида эътибор қаратди. Унинг сўзларига кўра, халқаро логистикадаги ўзгаришлар Ўзбекистон товарларини Европага етказиб бериш муддатларининг узайишига олиб келди, бу эса муқобил транспорт йўналишларининг аҳамиятини оширмоқда.
Сўнгги икки-уч йилда Озарбайжон орқали юк ташиш ҳажми икки баробарга ошди, жорий йилда эса ўсиш қарийб 30 фоизни ташкил этмоқда. Ўзбекистон ва Озарбайжон Каспий денгизи орқали ташувлар ҳажмини ошириш ва янги транспорт алоқаларини ривожлантириш устида ишламоқда.
Саноат кооперацияси соҳасида Ўзбекистон Озарбайжоннинг тўқимачилик ва автомобиль саноати лойиҳаларида иштирок этмоқда. Озарбайжоннинг Ўзбекистонга инвестициялари тоғ-кон саноати, энергетика, озиқ-овқат ишлаб чиқариш ва бошқа соҳаларга йўналтирилмоқда.
Форумда қуёш ва шамол энергетикаси соҳасида қўшма лойиҳаларни амалга ошириш салоҳияти ҳам муҳокама қилинди. Хусусан, Марказий Осиёдан Европага экологик тоза электр энергиясини етказиб бериш имконияти кўриб чиқилмоқда.
Ўзбекистоннинг инвестиция имкониятларини тақдим этар экан, Инвестициялар, саноат ва савдо вазири капитал бозорининг ривожланиши ҳамда Миллий инвестиция жамғармаси акцияларининг Лондон ва Тошкент биржаларидан жойлаштирилиши ҳақида маълумот берди. Устувор йўналишлардан бири сифатида рақамли иқтисодиёт қайд этилди. Ўзбекистон 2030 йилга қадар IT хизматлари экспортини 5 миллиард долларга етказишни мақсад қилган.
Лазиз Қудратов Озарбайжон оммавий ахборот воситаларига берган интервьюсида икки томонлама ҳамкорликнинг амалий йўналишлари ҳақида ҳам сўзлаб берди. Қўшма ишлаб чиқаришларни ривожлантириш яқин бир неча йилда Ўзбекистон ва Озарбайжон ўртасидаги товар айланмасини 2 миллиард долларга етказиш воситаларидан бири сифатида кўрилмоқда.
Истиқболли йўналишлар қаторида фармацевтика, қурилиш материаллари ишлаб чиқариш, қишлоқ хўжалиги ва озиқ-овқат маҳсулотларини қайта ишлаш соҳалари қайд этилди. Томонлар, шунингдек, Каспий денгизи орқали юк ташиш учун қўшма корхона ташкил этиш устида ишламоқда.
Бундан ташқари, нефтьни қайта ишлаш соҳасида ўзаро инвестициялар киритиш шартлари ҳамда SOCAR компаниясининг Ўзбекистонда автомобильларга ёқилғи қуйиш шохобчалари тармоғини ривожлантириш режалари кўриб чиқилмоқда.
