Тошкент, Ўзбекистон (UzDaily.uz) — Ўзбекистон ва IAOM Eurasia донни қайта ишлаш ва ун саноати соҳасида халқаро ҳамкорликни кенгайтиришни режалаштирмоқда. Бу ҳақда Ўзбекистон Савдо-саноат палатаси хабар берди.
25 сентябрь куни Ўзбекистон Савдо-саноат палатаси раиси Даврон Ваҳабов IAOM Eurasia директори, Ulusoy Mills компанияси директорлар кенгаши раиси доктор Эрен Гюнхан Улусой бошчилигидаги делегация билан учрашди.
Томонлар донни қайта ишлаш ва ун ишлаб чиқариш соҳасидаги ҳамкорликни янада ривожлантириш масалаларига асосий эътибор қаратди. Хусусан, замонавий технологияларни жорий этиш, илғор тажриба алмашиш ҳамда ўзбекистонлик ва хорижлик тадбиркорлар ўртасида янги ишбилармонлик алоқаларини ўрнатиш масалалари муҳокама қилинди.
Учрашувда, шунингдек, 28–29 сентябрь кунлари Тошкентда бўлиб ўтадиган IAOM Eurasia’нинг бешинчи йиллик конференцияси ва кўргазмасига тайёргарлик масалалари кўриб чиқилди.
Халқаро тадбир доирасида дон ва ун бозорларидаги вазият ҳамда замонавий тенденциялар, соҳани ривожлантиришнинг долзарб масалалари ва истиқболлари, шунингдек, савдо, логистика ва минтақавий интеграция масалаларини муҳокама қилиш режалаштирилмоқда. Дастурдан ун ишлаб чиқаришда замонавий технологияларни қўллаш масалалари ҳам алоҳида ўрин олади.
Савдо-саноат палатаси конференция ва кўргазмада маҳаллий тадбиркорлик субъектларининг фаол иштирокини таъминлаш учун уларга амалий кўмак кўрсатишга тайёрлигини билдирди.
Учрашув иштирокчиларининг баҳолашича, тадбир ўзбекистонлик ишлаб чиқарувчиларнинг хорижий компаниялар, халқаро ташкилотлар ва соҳа мутахассислари билан тўғридан-тўғри ҳамкорлик қилиши учун имконият яратади.
Кутилаётган иш йўналишлари қаторида илғор тажрибани ўрганиш, янги ҳамкорларни излаш ва истиқболли бизнес лойиҳаларини муҳокама қилиш бор.
Конференция ва кўргазманинг ўтказилиши донни қайта ишлаш ва ун саноати соҳасида ишбилармонлик алоқаларини янада ривожлантириш майдони сифатида ҳам кўриб чиқилмоқда.
