Тошкент, Ўзбекистон (UzDaily.uz) — Ўзбекистонлик гроссмейстер Жавоҳир Синдоров шахмат бўйича Live Rapid жаҳон рейтингида иккинчи ўринга кўтарилди. Унинг ҳозирги кўрсаткичи 2742,6 рейтинг очкосини ташкил этмоқда.
Сўнгги янгиланишдан кейин Синдоров 10,6 рейтинг очкоси қўшиб, бирданига тўрт поғона юқорилади. Натижада у Ян Непомнящий, Хикару Накамура ва Алиреза Фирузжаидан ўзиб кетди.
Рейтинг пешқадами бўлиб норвегиялик гроссмейстер Магнус Карлсен қолмоқда. Шу тариқа, Синдоров амалдаги тезкор шахмат рейтингида дунёнинг энг кучли шахматчилари орасида иккинчи ўринни эгаллаб турибди.
Ўзбекистоннинг яна бир вакили Нодирбек Абдусатторов эса, аксинча, бир поғона пастлаб, 13-ўринга тушди. Унинг рейтинги 2704,4 очкога тенг.
Шундай қилиб, ҳозирда Live Rapid жаҳон рейтингининг кучли ўн бешлигида Ўзбекистондан бирданига икки шахматчи бор.
Live Rapid рейтинги реал вақт режимида шакллантирилади. Шу сабабли шахматчиларнинг ўринлари ҳар бир ўтказилган партиядан кейин ўзгариши мумкин.
