Тошкент, Ўзбекистон (UzDaily.uz) — Ўзбекистон Бош вазирининг ўринбосари Жамшид Хўжаев мамлакатда фаолият юритаётган Туркиянинг 100 га яқин компанияси вакиллари билан учрашув ўтказди.
Музокаралар ноябрь ойида Тошкентда бўлиб ўтадиган Ўзбекистон ва Туркия ўртасида бизнесни қўллаб-қувватлаш бўйича Олий кенгаш йиғилишига тайёргарлик доирасида ташкил этилди.
Хўжаевнинг таъкидлашича, айни пайтда Ўзбекистонда Туркия инвестициялари иштирокидаги 2 400 га яқин компания фаолият юритмоқда.
Учрашувда иқтисодиётнинг турли тармоқлари, жумладан, энергетика, қурилиш ва инфратузилма, банк сектори, тўқимачилик ва тоғ-кон саноати, фармацевтика, озиқ-овқат маҳсулотлари ишлаб чиқариш ҳамда ахборот технологиялари соҳалари вакиллари иштирок этди.
Хўжаев тадбиркорлар билан тўғридан-тўғри мулоқот компаниялар дуч келаётган муаммоларни аниқлаш ва келгуси ҳамкорликнинг амалий кун тартибини шакллантириш имконини беришини таъкидлади.
Ўзбекистонда фаолият юритаётган турк инвесторларининг тажрибаси ҳам ишбилармонлик муҳитини такомиллаштиришга ёрдам бермоқда.
Вазирлик ва идоралар раҳбарлари билан ўтказилган муҳокамалар якунида томонлар бизнес вакиллари кўтарган масалаларни ҳал этиш бўйича кейинги қадамларни келишиб олдилар.
