Тошкент, Ўзбекистон (UzDaily.uz) — Ўзбекистон Давлат активларини бошқариш агентлиги (Давактив агентлиги) ва Осиё тараққиёт банки (ОТБ) давлат улуши мавжуд корхоналарга тўловга қобилиятсизлик тўғрисидаги қонунчиликни қўллаш ҳамда уларнинг молиявий ҳолатини бошқариш самарадорлигини ошириш чораларини муҳокама қилди.
Учрашувда ОТБнинг бош юридик маслаҳатчиси Ҳанна Ж. Лим ва банк эксперти Жон Мартин иштирок этди.
Томонлар «Тўловга қобилиятсизлик тўғрисида»ги қонунни амалиётда қўллаш масалаларини кўриб чиқди. Жумладан, корхоналардаги молиявий муаммоларни ўз вақтида аниқлаш, қарздорликни тартибга солиш ва кредиторлар билан ҳамкорликни яхшилашда қонун имкониятлари муҳокама қилинди.
Молиявий соғломлаштириш ва реструктуризация жараёнларига алоҳида эътибор қаратилди. Иштирокчилар қонунда назарда тутилган механизмларни қўллаш муаммоли вазиятларни кўриб чиқишни тезлаштириши ва корхонанинг тўлов қобилиятини тиклаш қийин бўлган ҳолларда ўз вақтида қарор қабул қилишга ёрдам бериши мумкинлигини муҳокама қилди.
Учрашув иштирокчиларининг фикрича, қонунчиликни изчил қўллаш молиявий интизомни мустаҳкамлаш, давлат активларидан янада оқилона фойдаланиш ва кредиторларнинг қонуний манфаатларини ҳимоя қилишга хизмат қилиши мумкин.
Музокаралар якунида томонлар қонунни қўллаш амалиётини такомиллаштириш, идоралараро ҳамкорликни мустаҳкамлаш ва давлат улуши мавжуд корхоналарни бошқариш самарадорлигини ошириш бўйича ҳамкорликни давом эттиришдан манфаатдор эканини тасдиқлади.
