Тошкент, Ўзбекистон (UzDaily.uz) — Фарғона шаҳри ва Андижон вилоятида умра зиёратини ташкил этиш баҳонасида ноқонуний пул йиғиш билан боғлиқ икки ҳолат аниқланди. Бу ҳақда Ўзбекистон Давлат хавфсизлик хизмати хабар берди.
Фарғона шаҳрида туристик фирманинг расмий бўлмаган ходими икки нафар фуқарони умра зиёратини адо этиш учун Саудия Арабистонига юборишни таклиф қилган. Сафарни ташкил этиш учун у тегишли рухсатномага эга бўлмаган ҳолда 2 500 доллар талаб қилган.
Давлат хавфсизлик хизмати ва Ички ишлар вазирлигининг ҳудудий бошқармалари ходимлари томонидан ўтказилган тезкор тадбир давомида эркак 2 450 долларни олаётган вақтда қўлга олинган.
Унга нисбатан жиноят иши қўзғатилган. Ҳозирда ушбу иш бўйича тергов ҳаракатлари олиб борилмоқда.
Шунга ўхшаш ҳолат Андижон вилоятининг Шаҳрихон туманида ҳам қайд этилган. Ноқонуний фаолият билан шуғулланган туристик фирма ходими тўрт нафар фуқарони зиёрат сафарига юбориш учун 4 400 доллар талаб қилган.
Вилоят Давлат хавфсизлик хизмати бошқармаси ва ички ишлар органлари ходимлари уни отаси билан бирга 4 300 долларни олаётган вақтда қўлга олган.
Мазкур ҳолат юзасидан терговга қадар текширув ҳаракатлари олиб борилмоқда.
