БМТнинг барқарор ривожланиш тармоғи Ўзбекистонда тузилди

Тошкент, Ўзбекистон (UzDaily.uz) — БМТнинг Барқарор ривожланиш соҳасида ечимларни излаш тармоғи (SDSN) 2026 йил 13 август куни ўзининг 60-миллий тармоғи — SDSN Uzbekistan ташкил этилганини маълум қилди. У Ўзбекистон Вазирлар Маҳкамаси ҳузуридаги Макроиқтисодий ва ҳудудий тадқиқотлар институти (МҲТИ) ҳамда Тошкентдаги Жаҳон иқтисодиёти ва дипломатия университети (ЖИДУ) томонидан биргаликда мувофиқлаштирилади. Бу ҳақда SDSN хабар берди.

SDSN Uzbekistan ҳамраислари этиб МҲТИ директори Умид Абидходжаев ва ЖИДУ ректори Содиқ Сафоев тайинланди. Янги тармоқ Марказий Осиёдаги SDSNнинг SDSN Kazakhstanдан кейинги иккинчи миллий тармоғи бўлади.

SDSN таъкидлашича, Ўзбекистон ва Қозоғистон аҳоли сони ҳамда иқтисодий салоҳияти бўйича минтақадаги энг йирик давлатлар сифатида трансчегаравий ҳамкорликни ривожлантириш, билим алмашиш ва Марказий Осиёда Барқарор ривожланиш мақсадларини амалга оширишда муҳим роль ўйнаши мумкин.

SDSN Uzbekistanнинг ташкил этилиши университетлар, илмий-тадқиқот ташкилотлари, давлат муассасалари, фуқаролик жамияти институтлари ва бошқа ҳамкорларнинг барқарор ривожланиш соҳасида биргаликда ишлашга қизиқиши ортиб бораётганини кўрсатади. Тармоқнинг вазифалари қаторига Барқарор ривожланиш мақсадларига эришиш ва иқлим бўйича Париж келишувини амалга оширишга кўмаклашиш киради.

SDSN Uzbekistan маҳаллий даражада ечимлар ишлаб чиқиш, узоқ муддатли ривожланиш моделларини шакллантиришга кўмаклашиш, билим алмашиш ва тармоқлараро ҳамкорликни ривожлантириш билан шуғулланади. SDSN режасига кўра, тармоқ фаолияти Ўзбекистон ва Марказий Осиёнинг бошқа мамлакатларида барқарор ривожланишни жадаллаштиришга хизмат қилиши керак.

Айни пайтда Ўзбекистондаги саккизта муассаса SDSN аъзоси ҳисобланади. Улар тармоқнинг SDG Academy, SDSN Youth ва SDGs Today каби дастурларида иштирок этиши мумкин. Бундан ташқари, иштирокчиларга барқарор ривожланиш соҳасида фаолият юритаётган мутахассислар ва ташкилотлар учун SDSNнинг ёпиқ платформаси — SustainChainдан фойдаланиш имконияти берилади.

Миллий тармоқ ташкил этилишидан олдин МҲТИ ва SDSN раҳбарияти ўртасида мулоқотлар ўтказилган. 2026 йил 11 июль куни институт SDSN президенти, профессор Жеффри Сакс билан учрашув ташкил қилди. Унда SDSN аъзоси бўлган муассасалар, Ўзбекистон Олий Мажлиси Сенати ва бошқа манфаатдор ташкилотлар вакиллари иштирок этди. Учрашув иштирокчилари барқарор ривожланиш соҳасида ҳамкорликни янада мустаҳкамлаш масалаларини муҳокама қилди.

Умуман, ҳозирги вақтда SDSN 47 та миллий ва 13 та минтақавий тармоқни бирлаштиради. Уларнинг ҳар бири котибият фаолиятини таъминлайдиган, тегишли мамлакат ёки минтақа университетлари ва ташкилотларини бирлаштирадиган ҳамда SDSN дастурларини амалга оширишга кўмаклашадиган бир ёки бир нечта ташкилотчи муассаса томонидан мувофиқлаштирилади.

Миллий ва минтақавий тармоқларнинг асосий вазифалари Барқарор ривожланиш мақсадларини қўллаб-қувватлашни сафарбар қилиш, ҳукуматларга барқарор ривожланиш вазифаларини ҳал этишда кўмаклашиш, амалий ечимлар ва узоқ муддатли стратегияларни илгари суриш, шунингдек, ушбу соҳада таълим ва илмий ҳамкорликни ривожлантиришдан иборат.

SDSN SDSN Uzbekistan билан ҳамкорлик қилиш ва Марказий Осиёда қўшма ташаббусларни ривожлантиришга тайёрлигини билдирди.