Айрим ҳуқуқбузарликлар учун маъмурий жавобгарлик бекор қилинади

Тошкент, Ўзбекистон (UzDaily.uz) —“Ўзбекистон Республикасининг Маъмурий жавобгарлик тўғрисидаги кодексига ҳуқуқий таъсир чораларини қўллашда мутаносиблик принципига амал қилинишини таъминлашга қаратилган ўзгартиришлар киритиш ҳақида”ги қонун лойиҳасининг муҳокамаси қизғин кечди.

Бугунги кунда мамлакатимизда амалга оширилаётган туб ислоҳотлар ва ижтимоий-сиёсий воқеликларнинг мазмунидан келиб чиқиб, ҳар бир соҳага алоҳида комплекс ёндашув асосида ҳуқуқбузарликка мос ҳуқуқий таъсир чораларини белгилашга қаратилган қатор қонунлар қабул қилинмоқда.

Мазкур қонун лойиҳаси билан ҳам қилмишларнинг хусусияти, жазолашдан кўзланган мақсадга эришиш учун етарлилигидан келиб чиққан ҳолда Маъмурий жавобгарлик тўғрисидаги кодексга айрим ҳуқуқбузарликлар учун маъмурий жавобгарликни бекор қилишга қаратилган тегишли ўзгартиришлар киритиляпти.

Қонун лойиҳасининг қабул қилиниши ҳуқуқий таъсир чораларини қўллашда мутаносиблик принципига амал қилинишини таъминлаш, фуқаролар ҳуқуқ ва эркинликларининг кафолатларини янада кучайтириш ҳамда тадбиркорлик фаолияти учун янада қулай шарт-шароитлар яратишга хизмат қилади.