7 августдан Ўзбекистонда ҳайвонларни рўйхатдан ўтказиш бошланади
Тошкент, Ўзбекистон (UzDaily.uz) — 7 августдан Ўзбекистонда уй ва қишлоқ хўжалиги ҳайвонларини ветеринария паспортини расмийлаштириш ҳамда давлат ҳисобига қўйиш орқали мажбурий рўйхатдан ўтказиш бошланади.
Ветеринария паспорти ҳайвоннинг идентификация рақами, унинг эгаси тўғрисидаги маълумотлар, шунингдек, ўтказилган эмлашлар ва даволаш ҳақидаги маълумотларни ўз ичига олган расмий ҳужжат бўлади.
Белгиланган тартибга мувофиқ, ҳайвон эгалари йирик шохли қорамол, қўй, эчки ва туяларни туғилганидан кейин 14 кун ичида, чўчқаларни 30 кун ичида, отларни тўрт ойлик ёшга етгунга қадар, ит ва мушукларни эса уч ойлик ёшга етгунга қадар рўйхатдан ўтказиши шарт.
Ветеринария паспортини расмийлаштириш учун ҳайвон эгаси ариза ва шахсни тасдиқловчи ҳужжат билан туман ёки шаҳар ветеринария бўлимига мурожаат қилиши лозим. Ҳайвонни давлат ҳисобига қўйиш ва ветеринария паспортини бериш уч кун ичида амалга оширилади.
Амалдаги қонунчиликда ҳайвонларни мажбурий идентификация қилиш ва рўйхатдан ўтказиш талаби аллақачон назарда тутилган.
Шу билан бирга, ҳайвонларни ўз вақтида давлат ҳисобига қўймаганлик учун жавобгарлик масаласи алоҳида норматив-ҳуқуқий ҳужжатлар билан тартибга солиниши мумкин.
